जलेश्वर । रामगोपालपुर नगरपालिका २ का वडाध्यक्ष मुकेशकुमार यादवको हत्या आरोपमा प्रहरीले दुई जनालाई आज गिरफ्तार गरेको छ । पक्राउ परेकाहरूमा औरही नगरपालिका ७ निवासी सञ्जीव झा र दिलीप मण्डल छन्, जसको जानकारी जिल्ला प्रहरी कार्यालयका प्रवक्ता, प्रहरी नायब उपरीक्षक सन्तुलालप्रसाद जैसवारले दिएका हुन् । जिल्ला प्रहरी कार्यालयले उनीहरूविरुद्ध कर्तव्य ज्यान मुद्दा दर्ता गरी अनुसन्धान थालेको छ ।
नेकपा (माओवादी केन्द्र) बाट वडाध्यक्षमा निर्वाचित भएका मुकेश यादव सवार लु.प्र.०१–००१प. ६३६२ नम्बरको मोटरसाइकल भदौ ९ गते बिहान जलेश्वर–बर्दिबास सडकखण्डको बर्दिबास नगरपालिका ८ स्थित कल्भर्ट नजिक दुर्घटना भएको थियो, जसमा उनको शव कल्भर्टमुनि सडकभन्दा तल फेला परेको थियो ।
घटना शंकास्पद भएको भन्दै माओवादी केन्द्रका नेता तथा कार्यकर्ताले गहन अनुसन्धानको माग गरेका थिए । दबाबमूलक कार्यक्रमले तिव्रता पाएपछि मुकेशका साथीहरू सञ्जीव र दिलीपलाई पक्राउ गरिएको हो ।
घटनाको अघिल्लो रात सञ्जीव, दिलीप र अन्य दुई महिला साथीहरूले वडाध्यक्ष मुकेशसँग बर्दिबासका विभिन्न होटलमा खाना र पेय पदार्थ सेवन गराएको र अबेर रातिसम्म उनीहरूसँगै बसेको माओवादी केन्द्रले दाबी गर्दै आएको छ ।
बिहान भने मुकेशको शव मृत अवस्थामा भेटिएको थियो, जसले घटनालाई थप शंकास्पद बनाएको छ । पक्राउ परेका सञ्जीव र दिलीपलाई जिल्ला अदालतबाट म्याद थप गरी कर्तव्य ज्यान मुद्दामा थप अनुसन्धान अगाडि बढाइएको छ ।
