सर्लाही । पूर्व–पश्चिम राजमार्ग अन्तर्गत सर्लाहीको लालबन्दीमा मोटरसाइकलको ठक्करबाट एक पुरुषको मृत्यु भएको छ । लालबन्दी नगरपालिका ६ स्थित फुटबल मैदान अगाडि बिहीबार साँझ ६ बजेतिर भएको दुर्घटनामा अन्दाजी ५० वर्षीय पुरुषको ज्यान गएको हो ।
लालबन्दीबाट परवानिपुरतर्फ जाँदै गरेको बा ९४ प ९२३४ नम्बरको मोटरसाइकलले ठक्कर दिएपछि ती पुरुषको घटनास्थलमै मृत्यु भएको इलाका प्रहरी कार्यालय लालबन्दीले जनाएको छ । मृतकको नाम, थर र वतन खुल्न नसकेको र तराई मूलका जस्तो देखिने बताइएको छ ।
घाइते दुई जना काठमाडौं रेफर
दुर्घटनामा मोटरसाइकल चालक लालबन्दी नगरपालिका १६, परवानिपुरका २१ वर्षीय विनोद कुमार श्रेष्ठ र मोटरसाइकलमा सवार ईश्वरपुर नगरपालिका १२, घारिबथानका २७ वर्षीय निरज लामा घाइते भएका छन् । घाइते दुवैलाई लालबन्दीमा प्राथमिक उपचारपछि थप उपचारका लागि काठमाडौं रेफर गरिएको प्रहरीले जनाएको छ ।
मृतकको पहिचानमा खोजी जारी
मृतक पुरुषको परिचय खुलाउन प्रहरीले विभिन्न युनिटमा परिपत्र जारी गरेको छ । शव म्याक्स अस्पताल लालबन्दीमा राखिएको छ भने पोस्टमार्टमका लागि प्रादेशिक अस्पताल मलङ्गवा पठाउन तयारी भइरहेको लालबन्दीका प्रहरी निरीक्षक सुजन पाठकले जानकारी दिए ।
थप अनुसन्धान जारी
घटनाको छानबिन गर्न प्रहरीले थप अनुसन्धान सुरु गरेको छ । स्थानीय बासिन्दाले सडक सुरक्षामा ध्यान दिन र दुर्घटनालाई कम गर्न पहल गर्न माग गरेका छन् ।
