बारा । बारा जिल्लाको निजगढ नगरपालिका ९ बकैयास्थित सडकमा सवारी साधनको ठक्करबाट अन्दाजी २४ वर्षीय एक युवकको मृत्यु भएको छ । मृतकको पहिचान हालसम्म खुल्न सकेको छैन ।
आइतबार राति अज्ञात सवारी साधनले युवकलाई ठक्कर दिएको थियो । गम्भीर घाइते भएका उनलाई तत्काल उपचारका लागि निजगढस्थित सिटी अस्पताल लगिएको थियो ।
उपचारकै क्रममा उनको मृत्यु भएको अस्पतालले जानकारी दिएको छ । सवारी साधन घटना लगत्तै फरार भएकोले प्रहरीले दोषी सवारीको खोजी गरिरहेको छ । प्रहरीका अनुसार घटनाको थप अनुसन्धान भइरहेको छ ।
सर्वसाधारणले यस्ता घटनामा सवारी चालक र पीडितको पहिचानमा सहकार्य गर्न आग्रह गरिएको छ । स्थानीय सडकमा यस्ता घटनाको पुनरावृत्ति रोक्न सडक सुरक्षाका उपाय अवलम्बन गर्न समेत जोड दिइएको छ ।
Advertisement
