रौतहट । रौतहटको कटहरिया नगरपालिकामा स्थानिय आपतकालीन कार्यसञ्चालन केन्द्र स्थापना गरिएको छ । आपतकालीन अवस्थामा द्रुत रूपमा समन्वय, राहत तथा उद्धार कार्य प्रभावकारी बनाउनका लागि उक्त केन्द्रको औपचारिक उद्घाटन गरिएको हो ।
उद्घाटन समारोहमा प्रमुख अतिथि प्रदेश सरकारका मुख्यमन्त्री तथा मन्त्री परिषद्को कार्यालयका सचिव एमेन्द्र उपाध्याय, विशिष्ट अतिथि गृह, संचार तथा कानुन मन्त्रालयका बिमल प्रसाद बराल उपस्थित थिए ।
कार्यक्रम नगर प्रमुख अजय प्रकाश जैसवालको अध्यक्षतामा सम्पन्न भएको थियो । सो अवसरमा उप–प्रमुख रीता देवी यादव, प्रमुख प्रशासकीय अधिकृत बिरबहादुर लहेरा र गृह तथा कानुन मन्त्रालयका सचिवले समेत संयुक्त रूपमा केन्द्रको उद्घाटन गरेका थिए ।
कार्यक्रम मार्फत आपतकालीन कार्यसञ्चालन केन्द्रको प्रमुखको जिम्मेवारी कौशल किशोर चौधरीलाई दिइएको अधिकृत लहेराले जानकारी दिए । नगरपालिकाका कर्मचारी, जनप्रतिनिधि तथा स्थानीय सरोकारवालाको समेत उल्लेख्य सहभागिता रहेको थियो ।
आपतकालीन कार्यसञ्चालन केन्द्र स्थापना हुनु कटहरिया नगरपालिकाको लागि महत्वपूर्ण उपलब्धि हो । यसले बाढी, आगलागी, महामारी जस्ता आकस्मिक अवस्थामा तत्काल निर्णय र उद्धार कार्यलाई सहज बनाउनेछ ।
उद्घाटन कार्यक्रममा प्रदेश सरकार, गृह तथा कानुन मन्त्रालयका प्रतिनिधि, नगर प्रमुख, उपप्रमुख लगायत सबै तहको उपस्थिति हुनु सकारात्मक सन्देश हो । यसले केन्द्रले प्रभावकारी ढंगले काम गर्न सहज वातावरण तयार गर्छ । कौशल किशोर चौधरीलाई प्रमुखको जिम्मेवारी दिइनुले केन्द्रको सञ्चालनमा स्पष्ट नेतृत्व सुनिश्चित भएको छ ।
केन्द्र स्थापना मात्र नभई यसको दीर्घकालीन सञ्चालन, प्राविधिक जनशक्ति, पर्याप्त उपकरण तथा पूर्वतयारी अभाव नहोस् भन्ने सुनिश्चितता आवश्यक देखिन्छ । यसरी हेर्दा कटहरिया नगरपालिकाले स्थानीय स्तरमै आपत व्यवस्थापनलाई प्राथमिकतामा राखेको छ ।
