बारा । पूर्वपश्चिम महेन्द्र राजमार्ग अन्तर्गत बाराको दुधौरा खोलाको डाइभर्सनमा जडान गरिएको बेलिब्रिज कमजोर बन्दै गएको छ । बेलिब्रिजमा रहेका कतिपय नटबोल्ट खुस्किएका छन्, सवारीसाधन गुड्ने फलामका पाताहरूमा प्वाल परेका छन्, र केही पाताहरू हल्लिएका छन् । यसले गर्दा दुर्घटना हुने सम्भावना दिन प्रतिदिन बढिरहेको छ ।
खोला पार गर्न बेलिब्रिजको उपयोग गर्न डर मान्दै यात्रा गर्नुको विकल्प यात्रुहरूसँग छैन । एक यात्रुवाहक बस चालकका अनुसार एक वर्ष अघिसम्म बेलिब्रिज ठिकठाक थियो, तर अहिले स्थिति भयावह बनेको छ ।
मालवाहक ट्रक चलाउने चालकहरूले बेलिब्रिजमा गाडीको चक्का परेपछि मुटु थर्कने अनुभव सुनाउँछन् । उनीहरू डर मानेर भगवानको नाम सम्झिँदै यात्रा गर्छन् । बेलिब्रिज नजिकै राजमार्गमा ट्राफिक चेकिङ भएपनि ट्राफिक प्रहरीले बेलिब्रिजको कमजोर अवस्था बारे सम्बन्धित निकायलाई जानकारी गराएको देखिँदैन ।
बेलिब्रिज बन्द भए डाइभर्सनमार्ग प्रयोग गर्नुपर्ने हुन्छ, तर त्यहाँका खाल्डाखुल्डीले गर्दा सवारीसाधन सञ्चालन गर्न अझै समस्या हुन्छ । बेलिब्रिज कमजोर हुँदा दुर्घटनाको सम्भावना रहेको देखेर सम्बन्धित निकायले मर्मतसम्भारको पहल गर्नुपर्ने हो ।
तर चार महिनाअघि डाइभर्सनका खाल्डाखुल्डी पुर्न थालिएपनि काम आधाअधूरो मात्र भएको छ । वरिपरि राजमार्ग सुरक्षा तथा ट्राफिक कार्यालय भए पनि बेलिब्रिज र डाइभर्सनको अवस्थाप्रति बेवास्ता गरिएको छ ।
सम्बन्धित निकायको लापरवाहीका कारण पुल निर्माण कार्य समयमा पूरा भएको छैन । ठेकेदार कम्पनीले तीन वर्षभित्र काम सम्पन्न गर्ने गरी ठेक्का पाएको भए पनि निर्माण कार्य हालसम्म ८५ प्रतिशत मात्र सम्पन्न भएको छ । निर्धारित समयभन्दा ढिलो भएपछि निर्माण अवधि पटक–पटक थपिएको छ, तर काम अझै पूरा भएको छैन ।
स्थानीय सवारी चालकहरूले ठेकेदार कम्पनी र सम्बन्धित विभाग बीचको समस्याका कारण यात्रुहरूले दैनिक सास्ती भोग्नुपरेको बताउँछन् । समयमै बेलिब्रिज उपलब्ध नगरिएपछि पुरानो पुल भत्काउन ढिलाइ हुँदा निर्माण कार्यमा बाधा परेको छ ।
