रौतहट । यमुनामाई गाउँपालिकास्थित प्रसिद्ध यमुनामाई मन्दिरको पश्चिमपट्टी रहेको ऐतिहासिक पोखरीको सौन्दर्य बिग्रने खतरामा परेको छ । हाल पोखरी किनारमा अनियमित रूपमा गोरहा (माटो र ढुंगाको मिश्रण) लगाएर प्राकृतिक दृश्यलाई असर पुर्याइएको देखिन्छ ।
स्थानीयवासीका अनुसार यो पोखरी क्षेत्र धार्मिक तथा सांस्कृतिक हिसाबले महत्वपूर्ण मात्र नभई पर्यटकीय दृष्टिकोणले समेत आकर्षणको केन्द्र रहँदै आएको छ । तर, अहिले किनारमा गिट्टी–बालुवा थुपारिएको दृश्यले पोखरीको प्राकृतिक सुन्दरतामा गम्भीर असर पुर्याइरहेको छ ।
सरोकारवाला निकायको ध्यानाकर्षण गर्दै स्थानीयहरूले यथाशीघ्र उचित कदम चाल्न माग गरेका छन् । उनीहरू भन्छन्, “यदि पोखरी वरपरको संरचना अव्यवस्थित बनाइयो भने यसको ऐतिहासिक तथा धार्मिक महत्व गुम्न सक्छ ।”
यस विषयमा सम्बन्धित निकायले चासो देखाएर तत्काल समाधान खोज्नुपर्ने स्थानीयहरूको माग रहेको छ । अन्यथा, प्राकृतिक सौन्दर्य गुम्दै जानुका साथै धार्मिक स्थलको पहिचान समेत कमजोर हुने चिन्ता व्यक्त गरिएको छ ।
