वीरगंज । बाराको प्रसौनीदेखि वीरगंज महानगरपालिका हुँदै निर्माणाधीन १३२ केभी भूमिगत प्रसारण लाइन परियोजनामा ठेकेदार कम्पनीको ढिलासुस्तीले स्थानीय बासिन्दाले सास्ती खेप्नुपरेको छ । काममा चरम ढिलाइ भएपछि सडक अस्तव्यस्त बनेको छ भने सवारी दुर्घटना समेत दिनहुँ बढ्दो छ ।
पावरहाउस चोकदेखि लक्ष्मणवा चोकसम्मको सडकखण्डमा भूमिगत प्रसारण लाइनका लागि खनिएका खाल्डाहरू महिनौंसम्म यथावत् छन् । रातिको समयमा चेतावनी संकेत वा प्रकाशको अभावमा मोटरसाइकल, जीप, कार, ई-रिक्सा र टेम्पो जस्ता सवारीसाधनहरू नियमितरूपमा दुर्घटनामा पर्ने गरेका छन् ।
स्थानीयहरूका अनुसार ठेकेदार कम्पनीको लापरवाहीले दैनिक आवागमनमा समस्या सिर्जना भएको छ । सडक, फुटपाथ र नालामा खनिएको माटोसमेत व्यवस्थापन नगरिएकाले गर्मी र हावाहुरीको समयमा धूलोले जनजीवन प्रभावित बनाएको छ ।
धूलो र ट्राफिक जामले थप पीडा
सडकमा भएका खाल्डाहरूका कारण दिनमा सवारी जाम बढेको छ भने रातिमा दुर्घटना हुने क्रम रोकिएको छैन । निर्माण कार्यको ढिलाइले स्कुल जाने बालबालिका, अस्पताल जाने बिरामीदेखि आम सर्वसाधारण सबैलाई असर परेको छ ।
म्याद पटक पटक थपिँदा पनि काममा प्रगति छैन
२.७ किलोमिटर लम्बाइको भूमिगत लाइन बिछ्याउने जिम्मा पाएको निर्माण कम्पनीलाई तोकिएको समयसीमा भंग भएपछि हाल म्याद असार मसान्तसम्मका लागि थपिएको छ ।
यद्यपि, कामको गति सुस्त छ र जनताले चाँडो समाधानको अपेक्षा गरेका छन् ।सम्बन्धित निकायले अब कामलाई तीव्रता दिने, खाल्डा पुरिने र दुर्घटना रोकथामका लागि आवश्यक सिग्नल तथा चेतावनी संकेतहरू राखिने जानकारी दिए ।
स्थानीयको माग: सुरक्षा र पारदर्शिता
स्थानीयहरूले विकासका नाममा नागरिकको सुरक्षालाई बेवास्ता नगरियोस् भन्ने माग गरेका छन् । उनीहरूका अनुसार, “सार्वजनिक सम्पत्तिको प्रयोग गर्दा जनताको सुरक्षालाई प्राथमिकता दिनुपर्छ ।”
योजना समयमै सम्पन्न गरी सुरक्षित र सहज यातायात व्यवस्था सुनिश्चित गर्न निर्माण कम्पनी र सरकारी निकाय दुवैको गम्भीर ध्यानाकर्षण आवश्यक देखिन्छ ।
