जनकपुरधाम । फागुन २१ मा हुने प्रतिनिधिसभा चुनावमा मधेस प्रदेश पूर्णतया निर्वाचनमय देखिएको छ । प्रदेशको ६१ लाख ४४ हजार ६०० जनसंख्यामा ३६ लाख ३६ हजार ४१३ मतदाता रहेका छन् र यहाँबाट ३२ जना प्रतिनिधिसभा सदस्य निर्वाचित हुनेछन् ।
यस पटक मधेस प्रदेशको निर्वाचन क्षेत्र राजनीति अझै जटिल बनेको छ । छिन्नभिन्न मधेस केन्द्रित दलहरू एकीकृत हुँदै प्रभाव कायम गर्न जुटेका छन् भने परम्परागत दल र नयाँ राजनीतिक शक्ति पनि आफ्नो मतदाता आधार कायम राख्न सक्रिय छन् ।
राष्ट्रिय स्वतन्त्र पार्टी (रास्वपा) ले ‘बालेन कार्ड’ प्रयोग गर्दै मधेसमा आफ्नो प्रभाव बढाउने प्रयास गरेको देखिन्छ । केही दिनअघि बालेन्द्र साह (बालेन) ले जनकपुरधाममा आयोजित सभालाई सम्बोधन गर्दै मधेस प्रदेशको मतदाता मन जित्ने प्रयास गरेका थिए । बालेनले झापा ५ बाट उम्मेदवारी दिएका छन् ।
अन्तरिम सरकारका युवा तथा खेलकुद मन्त्री बब्लु गुप्ताले राजीनामा दिएर सिरहा १ बाट उम्मेदवारी दर्ता गरेका छन् । उनी रास्वपाबाट चुनावी प्रतिस्पर्धामा रहेका छन् । यस क्षेत्रका प्रमुख प्रतिद्वन्द्वीहरूमा एमालेका रामशंकर यादव, नेपाली कांग्रेसका रामसुन्दर चौधरी, जसपा नेपालका सत्यनारायण यादव र जनमत पार्टीका रामस्वरूप चौधरी रहेका छन् ।
सिरहा जिल्लाका अन्य क्षेत्रहरूमा पनि नयाँ अनुहारले चुनावी तालमेलमा चासो थपेका छन् । सिरहा २ बाट रास्वपा, जसपा नेपाल, कांग्रेस र एमालेका उम्मेदवारहरू प्रतिस्पर्धा गरिरहेका छन् । सिरहा ३ मा सुभाषचन्द्र यादव (कांग्रेस), लीलानाथ श्रेष्ठ (एमाले), शम्भुकुमार यादव (रास्वपा) लगायतले चुनावी मैदानमा दाबी पेश गरेका छन् ।
सिरहा ४ मा भने जसपा नेपाल, एमाले, कांग्रेस र अन्य दलका उम्मेदवारबीच प्रतिस्पर्धा उल्लेख्य देखिन्छ । सप्तरी जिल्लामा चार निर्वाचन क्षेत्र छन् । सप्तरी १ मा एमाले, कांग्रेस, जसपा नेपाल, जपा र अन्य दलका उम्मेदवारहरू उम्मेदवारीमा छन् ।
२०७९ को निर्वाचनमा विजयी भएको नवलकिशोर साह सुडीको सन्तान यस पटक स्वाभिमान पार्टीबाट उम्मेदवार बनेका छन् । सप्तरी २ मा जपाका अध्यक्ष चन्द्रकान्त राउत, जसपा नेपालका उमेश यादव र एमालेका मोहम्मद जियाउल रहमान प्रतिस्पर्धामा छन् ।
धनुषा जिल्लामा पनि प्रतिस्पर्धा उत्साहजनक छ । धनुषा १ बाट नेकपा, कांग्रेस, जसपा र रास्वपा उम्मेदवार मैदानमा छन् । धनुषा २, ३ र ४ मा पनि एमाले, कांग्रेस, जसपा र अन्य दलका उम्मेदवारहरूले आफ्नो मतदाता आधार कायम राख्ने प्रयास गरिरहेका छन् ।
महोत्तरी जिल्लामा पनि राजनीतिक परिदृश्य गतिशील छ । महोत्तरी १ मा एमालेका लक्ष्मी महतो कोइरी र अन्य दलका उम्मेदवार प्रतिस्पर्धामा छन् । महोत्तरी २, ३, ४ मा जसपा नेपाल, कांग्रेस, रास्वपा, नेकपा र स्वतन्त्र उम्मेदवारहरूले प्रतिस्पर्धा गरिरहेका छन् ।
सर्लाही जिल्लामा प्रतिनिधिसभा क्षेत्र १ बाट ४ सम्मका उम्मेदवारहरू एमाले, कांग्रेस, जसपा, रास्वपा, जपा र अन्य दलबाट चुनावी तालमेल कायम राख्न जुटेका छन् ।
रौतहट, बारा र पर्सा जिल्लामा पनि निर्वाचन क्षेत्रहरूमा नयाँ र पुराना दुवै राजनीतिक अनुहारबीच प्रतिस्पर्धा तीव्र देखिन्छ ।
बारा २, ३, ४ र पर्सा १–४ क्षेत्रहरूमा एमाले, कांग्रेस, जसपा, रास्वपा र अन्य दलका उम्मेदवारले चुनावी तालमेल बनाउने र मतदाता आकर्षित गर्ने रणनीतिमा ध्यान केन्द्रित गरेका छन् । यसरी मधेस प्रदेशको चुनावी परिदृश्य गतिशील देखिन्छ ।
