बारा । बारामा चट्याङ लागेर एक जना किसानको मृत्यु भएको जिल्ला प्रहरी कार्यालयले जनाएको छ । मृत्यु हुनेमा जिल्लाको कोल्हवी नगरपालिका ५ सोनाभारका ३२ वर्षीय लुटावन चौधरी रहेको जिल्ला प्रहरी कार्यालयका प्रहरी प्रवक्ता विजयराज पण्डितले जानकारी दिए ।
खेतमा काम गरिरहेको समयमा उनलाई चट्याङ लागेको थियो । प्रहरीका अनुसार ठूलो हुरी बताससहित आएको वर्षाका क्रममा छठिघाट नजिकको खेतमा काम गरिरहेका बेला चौधरीलाई चट्याङ लागेको हो । चट्याङ लागेपछि उनी खेतमै ढलेका थिए ।
घटनास्थलमै गम्भीर घाइते भएका चौधरीलाई सँगै रहेका स्थानीयले तत्काल घरतर्फ लगेका थिए । घर पुर्याउँदा उनको मृत्यु भइसकेको प्रहरीले जनाएको थियो । घटना बारे थप अनुसन्धान भइरहेको प्रहरीले जनाएको छ । मृतक चौधरीको श्रीमती र दुई छोरा छन् ।
Advertisement
