वीरगञ्ज । नारायणी अस्पतालमा पछिल्लो केही सातादेखि बिरामीको चाप असामान्य रूपमा बढेसँगै स्वास्थ्य सेवा व्यवस्थापनमा दबाब तीव्र बनेको छ । सीमित पूर्वाधार र जनशक्तिको भरमा लामो समयदेखि सेवा दिँदै आएको अस्पताल अहिले बढ्दो बिरामी संख्याका कारण गम्भीर व्यवस्थापकीय चुनौतीसँग जुधिरहेको छ ।
अस्पताल प्रशासनका अनुसार निजी अस्पतालमा स्वास्थ्य बीमाअन्तर्गतको सेवा सीमित भएपछि धेरै बिरामी सरकारी अस्पतालतर्फ मोडिएका छन् । साथै गर्मीको मौसम बढेसँगै डायरिया, ज्वरो र श्वासप्रश्वाससम्बन्धी समस्या लिएर आउने बिरामीको संख्या पनि उल्लेखनीय रूपमा बढेको छ । यसको प्रत्यक्ष असर आपत्कालीन कक्षदेखि वार्डसम्म देखिन थालेको छ ।
अस्पतालका प्रवक्ता डा. उदयनारायण सिंहका अनुसार उपलब्ध स्रोत साधनका बाबजुद चिकित्सक तथा स्वास्थ्यकर्मीहरूले निरन्तर सेवा दिइरहेका छन् । तर, जनशक्ति र पूर्वाधारको अभावले कार्यभार अत्यधिक बढेको र त्यसले सेवा प्रवाहमा दबाब सिर्जना गरेको उनले बताए ।
उनका अनुसार अस्पतालमा बिरामीको चाप बढेसँगै उपचार व्यवस्थापन, शय्या व्यवस्थापन र आपत्कालीन सेवा सञ्चालन दुवै पक्ष चुनौतीपूर्ण बनेका छन् । “सीमित जनशक्ति र संरचनाका बीच सेवा दिनुपर्ने अवस्था छ, जसले स्वास्थ्यकर्मीहरूलाई अतिरिक्त दबाबमा काम गर्न बाध्य बनाएको छ,” उनले भने ।
अस्पताल स्रोतका अनुसार आपत्कालीन कक्षमा बिरामीको अत्यधिक भीडका कारण कतिपय अवस्थामा शय्या अभाव हुँदा अस्थायी रूपमा भुइँमै राखेर उपचार गर्नुपर्ने अवस्था समेत आएको छ । अन्य वार्डहरूमा पनि बेड अभाव देखिन थालेको छ, जसले सेवा प्रवाहलाई थप जटिल बनाएको छ ।
यसैबीच, चिकित्सक र स्वास्थ्यकर्मीको मनोबल प्रभावित हुने खालका आलोचनात्मक टिप्पणी र असन्तोषजनक वातावरण प्रति पनि अस्पताल प्रशासनले ध्यानाकर्षण गराएको छ । अस्पतालका प्रवक्ताले यस्तो अवस्थामा सबै पक्षबाट सहकार्य र समर्थन आवश्यक रहेकोमा जोड दिएका छन् ।
बढ्दो दबाबसँगै स्थानीयवासी र सेवाग्राहीहरूले तत्काल जनशक्ति वृद्धि, शय्या विस्तार, उपकरण आपूर्ति र पूर्वाधार सुधारको माग गरेका छन् । उनीहरूको भनाइमा सरकारी अस्पतालमा निर्भरता बढ्दै गएको अवस्थामा सेवा क्षमता विस्तार अब अपरिहार्य बनिसकेको छ ।
स्वास्थ्य क्षेत्रका विज्ञहरूका अनुसार नारायणी अस्पतालजस्ता प्रदेशस्तरीय संस्थामा दीर्घकालीन सुधार नगरेसम्म यस्तो चाप बारम्बार दोहोरिन सक्छ । योजनाबद्ध लगानी, दक्ष जनशक्ति विस्तार र संरचनागत सुधार नभए भविष्यमा सेवा प्रवाह अझै जटिल हुने चेतावनी उनीहरूले दिएका छन् ।
