रौतहट । रौतहटका लागि गरुडा–कटहरिया सडक केवल एउटा सडक मात्र होइन, हजारौँ नागरिकको दैनिक जीवनसँग जोडिएको जीवनरेखा हो । तर वर्षौँदेखि मर्मतको अभावमा जीर्ण बन्दै गएको यही सडक अहिले स्थानीयका लागि सुविधा होइन, सास्तीको पर्याय बनेको छ ।
बिहान विद्यालय जाने विद्यार्थीदेखि अस्पताल हतारिएका बिरामी, बजारतर्फ कृषि उपज बोकेर हिँडेका किसान र व्यापारका लागि दैनिक आवतजावत गर्ने व्यवसायी सबैको यात्रा यही सडकले कठिन बनाइदिएको छ । सडकभरि परेका गहिरा खाल्डाखुल्डी, वर्षायाममा जम्ने हिलो र पानी तथा सुक्खा मौसममा उड्ने धुलोले स्थानीयको दैनिकी नै प्रभावित भएको छ ।
स्थानीयका अनुसार सडकका विभिन्न स्थानमा दुईदेखि तीन फिटसम्म गहिरा खाल्डा परेका छन् । वर्षा हुँदा ती खाल्डामा पानी भरिने भएकाले सवारी साधन फस्ने, मोटरसाइकल चालक दुर्घटनामा पर्ने जोखिम बढ्ने र आवागमन झन् कठिन हुने गरेको छ ।
सडकको अधिकांश कालोपत्रे उप्किएपछि सुक्खा मौसममा अत्यधिक धुलो उड्ने समस्या पनि उस्तै गम्भीर छ । सडक किनारमा बसोबास गर्ने नागरिकले धुलोका कारण श्वासप्रश्वाससम्बन्धी समस्या बढ्नुका साथै घर, पसल र दैनिक जीवन नै प्रभावित भएको गुनासो गरेका छन् ।
झाँझपुल–कटहरिया–बिर्ती सडक रौतहटको सदरमुकाम गौर तथा सर्लाही जोड्ने प्रमुख सडकमध्ये एक हो । दैनिक हजारौँ यात्रु र सयौँ सवारी साधन यही मार्ग प्रयोग गर्छन् । तर सडकको दयनीय अवस्थाका कारण छोटो दूरी पार गर्न समेत अपेक्षाभन्दा धेरै समय लाग्ने गरेको स्थानीय बताउँछन् ।
यसको असर स्थानीय अर्थतन्त्रमा पनि परेको छ । व्यवसायीहरूका अनुसार ढुवानीमा ढिलाइ, सवारी साधन बारम्बार बिग्रिने समस्या र मर्मत खर्च बढ्दा व्यवसाय सञ्चालन महँगो बन्दै गएको छ । किसानहरूले पनि कृषि उपज समयमै बजारसम्म पुर्याउन नसक्दा आर्थिक नोक्सानी व्यहोर्नुपरेको बताएका छन् ।
सबैभन्दा बढी जोखिममा भने मोटरसाइकल चालक रहेको स्थानीयको भनाइ छ । सामान्य वर्षामै खाल्डाखुल्डी पानीले ढाकिने भएकाले सडकको वास्तविक अवस्था देख्न नसक्दा दुर्घटनाको सम्भावना बढ्ने गरेको उनीहरू बताउँछन् । एम्बुलेन्स, विद्यालय बस र सार्वजनिक यातायातका साधनसमेत सहज रूपमा सञ्चालन हुन नसक्दा स्थानीयको दैनिकी थप कष्टकर बनेको छ ।
स्थानीयवासीले पटक–पटक सम्बन्धित निकायको ध्यानाकर्षण गराए पनि प्रभावकारी पहल नभएको भन्दै असन्तुष्टि व्यक्त गरेका छन् । उनीहरूले वर्षायामअघि नै खाल्डाखुल्डी पुर्ने, प्रभावकारी पानी निकासको व्यवस्था गर्ने र दीर्घकालीन समाधानका रूपमा सडक स्तरोन्नति गरी गुणस्तरीय कालोपत्रे निर्माण गर्न माग गरेका छन् ।
समयमै मर्मत कार्य सुरु नभए चरणबद्ध आन्दोलनमा उत्रिन बाध्य हुने चेतावनी समेत स्थानीयले दिएका छन् । उनीहरूका अनुसार अब आश्वासनभन्दा पनि सडकमा देखिने कामको आवश्यकता छ ।
