काठमाडौं । नेपाल विद्युत् प्राधिकरणको धरानस्थित कार्यालयको सवारी दुर्घटना हुँदा दुई जनाको मृत्यु भएको छ भने एक जना घाइते भएका छन् । सुनसरीको इटहरी उपमहानगरपालिका २० स्थित सेउती पुल नजिक गएराति सवारी दुर्घटना भएको थियो ।
धरानबाट इटहरीतर्फ जाँदै गरेको बा १ ञ १६५१ नम्बरको स्कारपियो गाडी राति करिब ११:३० बजे दुर्घटना भएको जिल्ला प्रहरी कार्यालय सुनसरीका सूचना अधिकारी प्रहरी नायब उपरीक्षक चन्द्रबहादुर खड्काले जानकारी दिए ।
दुर्घटनामा परी गाडी चालक धरान उपमहानगरपालिका १३ का बिर्ख राई र नेपाल विद्युत् प्राधिकरणका कर्मचारी धरान १६ का सुमन आचार्य गम्भीर घाइते भएका थिए ।
दुवैलाई उपचारका लागि धरानस्थित वीपी कोइराला स्वास्थ्य विज्ञान प्रतिष्ठान लगिएकोमा राति करिब १२:४५ बजे चिकित्सकले मृत घोषणा गरेको सूचना अधिकारी खड्काले बताए ।
दुर्घटनामा घाइते भएका धरान २० का पदम राईको प्रतिष्ठानमा उपचार भइरहेको छ । घटनाबारे अनुसन्धान भइरहेको जिल्ला प्रहरी कार्यालय सुनसरीले जनाएको छ ।
