वीरगञ्ज । वीरगञ्जस्थित नारायणी अस्पतालबाट चोरी भएको एक दिनको नवजात शिशुलाई प्रहरीले करिब १६ घण्टापछि सकुशल उद्धार गरेको छ । शिशु चोरी गरेको आरोपमा प्रहरीले वीरगञ्ज महानगरपालिका १६ इनर्वाकी सबिना खातुनलाई पक्राउ गरेको छ ।
जिल्ला प्रहरी कार्यालय पर्साका प्रहरी उपरीक्षक पवन भट्टराईका अनुसार रातभर गरिएको खोजी, अनुसन्धान र निगरानीपछि सोमबार बिहान खातुनलाई शिशुसहित नियन्त्रणमा लिइएको हो ।
प्रहरीका अनुसार पक्राउ परेकी खातुनले प्रारम्भिक बयानका क्रममा आफू निःसन्तान भएकाले बच्चा चोरी गरेको बताएकी छन् । यद्यपि, उनको बयानलाई मात्र आधार बनाएर निष्कर्षमा पुग्न नसकिने भन्दै प्रहरीले घटनामा अन्य व्यक्तिको संलग्नता थियो वा थिएन भन्ने विषयमा थप अनुसन्धान गरिरहेको जनाएको छ ।
जन्मिएको एक दिन नपुग्दै अस्पतालबाट शिशु गायब
सर्लाहीको रामनगर गाउँपालिका ३ बहुअर्वाकी रिन्कु देवीले शनिबार राति करिब ११ बजे नारायणी अस्पतालमा शल्यक्रियामार्फत छोरालाई जन्म दिएकी थिइन् । तर, जन्मिएको एक दिन पनि नपुग्दै आइतबार नवजात शिशु अस्पतालबाटै हराएपछि परिवारमा खलबली मच्चिएको थियो ।
प्रहरीका अनुसार अस्पतालमा रहेकी शिशुकी हजुरआमासँग एक अपरिचित महिला सम्पर्कमा आएकी थिइन् । ती महिलाले आफू अस्पतालको कुचिकार भएको बताउँदै बच्चालाई केहीबेर खेलाउन माग गरेकी थिइन् ।
परिवारले विश्वास गरेर बच्चा ती महिलाको जिम्मा लगाएपछि उनी शिशु लिएर अस्पताल परिसरबाट बाहिरिएकी थिइन् । लामो समयसम्म ती महिला बच्चासहित नफर्किएपछि परिवारले खोजी सुरु गरेको थियो । कतै फेला नपरेपछि परिवारले तत्काल प्रहरीलाई खबर गरेको थियो ।
१६ घण्टापछि इनर्वाबाट शिशुको उद्धार
घटनाको सूचना प्राप्त हुनासाथ पर्सा प्रहरीले खोजी तथा अनुसन्धान तीव्र बनाएको थियो । प्रहरीले संदिग्ध महिलाको हुलिया, सम्भावित आवतजावत र अन्य सूचनाका आधारमा विभिन्न क्षेत्रमा निगरानी बढाएको थियो ।
रातभरको निरन्तर खोजी तथा अनुसन्धानपछि करिब १६ घण्टामा प्रहरीले वीरगञ्ज महानगरपालिका १६ इनर्वाबाट खातुनलाई शिशुसहित नियन्त्रणमा लिन सफल भएको हो ।
प्रहरीले शिशुको सकुशल उद्धार गरी आवश्यक कानुनी प्रक्रिया पूरा गरेपछि परिवारको जिम्मा लगाएको जनाएको छ । उद्धार गरिएको शिशुको स्वास्थ्य अवस्था सामान्य रहेको प्रहरीले बताएको छ ।
‘नि:सन्तान भएकाले बच्चा चोरी गरेँ’
पक्राउ परेकी खातुनले प्रारम्भिक बयानमा आफू नि:सन्तान भएकाले बच्चा चोरी गरेको बताएकी छन् । तर, प्रहरीले उनको भनाइलाई मात्र आधार मानेर अनुसन्धान सीमित नगरेको जनाएको छ ।
खातुन अस्पतालसम्म कसरी पुगिन्, शिशु चोरी पूर्वयोजनाअनुसार गरिएको थियो वा आकस्मिक रूपमा घटना भएको हो, शिशुलाई कहाँ लैजाने तयारी थियो तथा घटनामा अन्य व्यक्तिको संलग्नता वा सहयोग थियो कि थिएन भन्ने विषयमा प्रहरीले अनुसन्धान गरिरहेको छ ।
अस्पतालको सुरक्षा व्यवस्थामाथि प्रश्न
नारायणी अस्पतालजस्तो संवेदनशील स्वास्थ्य संस्थाबाटै नवजात शिशु चोरी भएपछि अस्पतालको सुरक्षा व्यवस्थामाथि समेत प्रश्न उठेको छ । अपरिचित व्यक्तिको सहज प्रवेश तथा नवजात शिशुसम्म पुगेर बच्चालाई अस्पताल परिसरबाट बाहिर लैजान सक्ने अवस्थाले अस्पतालको सुरक्षा प्रणालीमा कमजोरी रहेको देखाएको भन्दै आलोचना भइरहेको छ ।
विशेष गरी प्रसूति तथा नवजात शिशु कक्षमा प्रवेश गर्ने व्यक्तिको पहिचान, कुरुवा व्यवस्थापन, आगन्तुकको निगरानी तथा सुरक्षा जाँचलाई थप कडाइ गर्नुपर्ने आवश्यकता घटनाले औँल्याएको छ । घटनाबारे प्रहरीले पक्राउ परेकी खातुनमाथि थप अनुसन्धान जारी राखेको जनाएको छ ।
