काठमाडौं । अख्तियार दुरुपयोग अनुसन्धान आयोगले पर्यटन विभाग, भृकुटीमण्डपमा कार्यरत सिनियर डिभिजनल इन्जिनीयर सचिन्द्रकुमार यादवविरुद्धको भ्रष्टाचार मुद्दामा सर्वोच्च अदालतमा पुनरावेदन दर्ता गरेको छ ।
अख्तियारका अनुसार यादवले सार्वजनिक पदको दुरुपयोग गरी गैरकानूनीरूपमा सम्पत्ति आर्जन गरेको आरोपमा ९६ लाख ८५ हजार ५५३ रुपैयाँ १९ पैसा बिगो कायम गरी विशेष अदालत, काठमाडौंमा आरोपपत्र दायर गरिएको थियो ।
आयोगले भ्रष्टाचार निवारण ऐन, २०५९ बमोजिम कैद तथा बिगो बराबर जरिवाना र गैरकानूनीरूपमा आर्जन गरिएको सम्पत्ति जफत गर्न माग गरेको थियो ।
यादवले गैरकानूनीरूपमा आर्जन गरेको भनिएको सम्पत्ति लुकाइछिपाइ राखेको तथा पत्नी आशाकुमारी यादवको नाममा समेत घरजग्गा खरीद गरेको देखिएको भन्दै उक्त सम्पत्ति जफत गर्ने प्रयोजनका लागि आशाकुमारीलाई समेत प्रतिवादी कायम गरिएको अख्तियारले जनाएको छ ।
तर विशेष अदालतले २०८२ चैत ८ गतेको फैसलाबाट आशाकुमारी यादवलाई सफाइ दिएको थियो । उक्त फैसलाप्रति चित्त नबुझेपछि अख्तियारले २०८३ असोज १६ गते सर्वोच्च अदालतमा पुनरावेदन निवेदन दर्ता गरेको आयोगका प्रवक्ता सुरेश न्यौपानेले जानकारी दिए ।
आयोगले भ्रष्टाचारबाट आर्जन भएको भनिएको सम्पत्ति जफत गर्ने प्रयोजनका लागि आशाकुमारीलाई प्रतिवादी कायम गरिएको जनाएको छ । सर्वोच्च अदालतमा पुनरावेदन दर्ता भएपछि उक्त फैसलाको कानूनी पुनरावलोकनको प्रक्रिया अघि बढेको छ ।
आयोगका अनुसार मुद्दामा गैरकानूनी सम्पत्ति आर्जन तथा त्यसको लुकाइछिपाइसँग सम्बन्धित कानूनी प्रावधानका आधारमा थप न्यायिक प्रक्रिया अघि बढाइनेछ ।
