वीरगंज । पर्सा जिल्लाका ग्रामीण क्षेत्रका पालिकाहरूका माध्यमिक विद्यालयहरूमा विषयगत शिक्षकहरूको अभावका कारण अध्यापनमा समस्या देखिएको छ । पालिकाहरूले दरबन्दी अनुसार शिक्षकहरूको व्यवस्था गर्ने प्रतिबद्धता व्यक्त गर्दै आएपनि शैक्षिक सत्र २०८१ का आठ महिना बितिसक्दा पनि यो समस्या समाधान भएको छैन ।
विषयगत शिक्षकहरूको अभावका कारण प्राथमिक र निम्न माध्यमिक तहका शिक्षकहरूले कक्षा ९, १० र कहिले काहीँ कक्षा ११ तथा १२ का विद्यार्थीहरूलाई समेत पढाउनुपरेको छ । यसले पठन पाठनको गुणस्तरमा असर पुर्याएको छ, विशेष गरी नेपाली, अंग्रेजी, सामाजिक शिक्षा, लेखा, जनसंख्या र वातावरणजस्ता विषयहरूमा ।
कमजोर शैक्षिक परिणाम
धोबिनी गाउँपालिका १ स्थित नेपाल राष्ट्रिय माध्यमिक विद्यालय भिखमपुरका प्रधानाध्यापक विनय कुर्मीका अनुसार, विद्यालयमा नेपाली, विज्ञान र सामाजिक विषयका शिक्षक छैनन् । यी विषयहरू प्राथमिक र निम्न माध्यमिक तहका शिक्षकहरूले अध्यापन गराउँदै आएका छन् ।
परिणामस्वरूप, कक्षा ९ र १० का विद्यार्थीहरूले एसईई परीक्षामा यी विषयहरूमा कम अंक ल्याउने गरेका छन् । प्राध्यापक कुर्मीले पालिका र संघ सरकारले यस समस्यामा ध्यान नदिएको गुनासो गरेका छन् । उनले विद्यालयलाई राम्रो नतिजाको मात्र अपेक्षा गर्ने तर आवश्यक स्रोत साधनको व्यवस्था नगर्ने प्रवृत्ति प्रति असन्तोष व्यक्त गरे ।
समस्या सर्वत्र, समाधान अपूरो
यो समस्या पर्साका अधिकांश पालिकामा देखिएको छ । विन्ध्यवासिनी गाउँपालिका ३ स्थित रामस्वरूप रामप्रीत चौरसिया मावि झौवा र राधाकृष्ण चौरसिया मावि बहुअर्वाभाठाको अवस्था पनि उस्तै छ ।
झौवामा नेपाली र सामाजिक विषयका शिक्षकको अभाव छ भने बहुअर्वाभाठामा नेपाली र अंग्रेजी विषयमा समस्या छ । वीरगंज महानगरपालिका १६ नगवास्थित विद्यालयमा केही समयअघि विषयगत शिक्षकको अभावको विरोधमा विद्यार्थीहरूले प्रदर्शन गरेका थिए ।
उक्त विरोधपछि निजी स्रोतबाट शिक्षक नियुक्त गरिएको थियो । तर, अन्य पालिकामा यस्तो व्यवस्थापन हुन सकेको छैन र विद्यार्थीहरू बेलाबखत आन्दोलन गर्न बाध्य भइरहेका छन् ।
पर्साका १४ वटै पालिकामा विषयगत शिक्षक अभाव समस्या सामान्य बनेको छ । यो समस्या तत्काल समाधान नगर्ने हो भने सामुदायिक विद्यालयहरूको शैक्षिक स्तर अझ कमजोर हुने प्रस्ट संकेत देखिएको छ ।
