सिरहा । सिरहाको गोलबजार नगरपालिका १३ दुर्गापुरमा सोमबार भएको झडपमा प्रदेशसभा सदस्य शाहिदा खातुनसहित १८ जना घाइते भएका छन् । हत्याको विषयलाई लिएर स्थानीय वासीको भेलामा विवाद चर्किएपछि झडप भएको हो ।
झडपमा दुवै पक्षका ९/९ जना घाइते भएका छन् । उनीहरूको उपचार गोलबजारस्थित भुमिजा अस्पताल र वर्धमान अस्पतालमा भइरहेको जिल्ला प्रहरी कार्यालय सिरहाका सूचना अधिकारी डीएसपी वीरेन्द्रकुमार पासवानले जानकारी दिए ।
हत्या घटनाको विवाद
गत कात्तिक २७ गते २० वर्षीय कृष्णकुमार महराको हत्या भएपछि स्थानीयले छलफलका क्रममा प्रदेशसभा सदस्य खातुनका भाइ मोहमद रहिमसहितको समूहले कुटपिट गर्न थालेको आरोप लगाएका छन् ।
स्थानीयवासी मोहम्मद सोवरथले खातुन पक्षले छलफलका क्रममा गालीगलौज गर्दै आक्रमण गरेको दाबी गरेका छन् । पीडित पक्षका अभिभावकले खातुनलाई बोलाउन खोज्दा उनीहरूको समूहले हातपात गरेको घाइते दिपर खातुनले बताइन् ।
प्रदेशसभा सदस्य खातुनले भने आफूले कुनै दबाब नदिएको र घटना कानुनले हेर्ने विषय भएको बताएकी छन् । उनले आरोपको खण्डन गर्दै यो बदनाम गर्ने प्रयास मात्र भएको बताइन् । “म कानुनभन्दा बाहिर जान सक्दिनँ । हत्याको विषय कानुनले हेर्ने हो,” उनले भनिन् ।
आर्थिक हिनामिना र विवाद
मदरसाका अध्यक्ष मोहम्मद सोवरथले आर्थिक हिनामिनाको विषय उठाएपछि आफ्नो बदनाम गर्न घटना घटाइएको दाबी गरेका छन् । उनले भने, “मैले मदरसाको हिसाब मागेपछि बदनाम गर्ने नियतले ममाथि हमला गरियो ।”
प्रहरीको हस्तक्षेप
झडपमा संलग्न तीन जनालाई प्रहरीले नियन्त्रणमा लिएको छ । अर्को पक्षले उजुरी दिए थप कारबाही अघि बढाइने जिल्ला प्रहरी कार्यालय सिरहाका डीएसपी पासवानले बताए । घटना बारे प्रहरीले अनुसन्धान जारी राखेको जनाएको छ ।
