बारा । बारा जिल्लाको जितपुर सिमरा उपमहानगरपालिका १ पथलैया चोकबाट शनिबार राति लागूऔषधसहित एक किशोरी पक्राउ परेकी छन् । प्रहरीले १८ वर्षीया रौतहट कटहरिया नगरपालिका ७ की किशोरीलाई लागूऔषधसहित नियन्त्रणमा लिएको हो ।
प्रहरीका अनुसार किशोरीको साथबाट नोर्फिन १,२०० पिस, डाइजेपाम १,२०० पिस र फेनारगन १,२०० पिस लागूऔषध बरामद गरिएको छ । पथलैया प्रहरी चौकीबाट खटिएको प्रहरी टोलीले उनलाई पक्राउ गरेको हो ।
प्रहरीले गौरबाट काठमाडौं जाँदै गरेको बा प्र ०१-००६ ख ५१५९ नम्बरको बसमा सवार ती किशोरीलाई लागूऔषधसहित पक्राउ गरेको हो । बसमा चेकजाँच गर्ने क्रममा उक्त लागूऔषध फेला परेको प्रहरीको भनाइ छ ।
पक्राउ परेकी किशोरीमाथि थप अनुसन्धान भइरहेको प्रहरीले जनाएको छ । लागूऔषध नियन्त्रण अभियान अन्तर्गत प्रहरीले यस्ता घटनामा संलग्न व्यक्तिहरूलाई कानूनी कारबाहीको दायरामा ल्याउने प्रतिबद्धता जनाएको छ ।
प्रहरीले लागूऔषधको कारोबार र दुरुपयोग रोक्न नागरिकहरूलाई सचेत रहन आग्रह गरेको छ । यस्ता अवैध क्रियाकलापले युवापुस्तामा नकारात्मक प्रभाव पर्ने भएकाले प्रहरीले नियन्त्रण अभियानलाई अझ सशक्त बनाउने बताएको छ ।
