बारा । पर्सा राष्ट्रिय निकुञ्जको विस्तारसँगै स्थानीयवासीहरू वन्यजन्तुको आक्रमणबाट पीडित बनेका छन् । जङ्गली हात्ती, बाघ, चितुवा लगायतका जनावर बस्तीमा पसेर जनधन र बालीनालीको क्षति पुर्याउँदै आएको छ । यसका कारण स्थानीयहरू दिनरात त्रासमा जीवन बिताउन बाध्य भएका छन् ।
पछिल्लो तीन महिनायता बाराको कोल्हवी नगरपालिकाको वन क्षेत्र नजिकका बस्तीमा वन्यजन्तुको त्रास बढेको छ । साँझ पर्नासाथ जङ्गली हात्ती बस्तीमा पसेर घर भत्काउने, अन्न नष्ट गर्ने घटना नियमित भएको छ । एक स्थानीयका अनुसार जङ्गली हात्तीले हालै घर आँगनमा राखेको भकारी भत्काएर धान नष्ट गर्यो ।
अर्का एक वृद्धाले आफ्नो भान्साघर हात्तीले भत्काएको बताए । हात्तीले ज्यानै जोखिममा पार्ने डरले कतिपय स्थानीय बासिन्दा बेलुकीपख सुरक्षित स्थानतर्फ जाने गरेका छन् । बस्तीका अन्य क्षेत्रका मानिसहरूले पनि जङ्गली हात्तीका कारण उखु, तोरी, आलु, केरा, मकै लगायतका बालीनालीमा ठूलो क्षति भएको बताएका छन् ।
नगरपालिकाका एक प्रतिनिधिले वन्यजन्तुको त्रासका कारण बस्तीमा रातभर होहल्ला हुने र मानिसहरू सुत्न नसक्ने अवस्था रहेको जानकारी दिए । तीन महिनादेखि बस्तीमा पसेको एक जङ्गली हात्तीले दिनभरि नजिकैको वन क्षेत्रमा बसेर रातमा बस्तीमा प्रवेश गर्ने गरेको छ । यसले घर भत्काउने र अन्न नष्ट गर्ने क्रम निरन्तर जारी राखेको छ ।
पछिल्ला केही वर्षमा जङ्गली हात्तीको आक्रमणले नगरपालिकामा ११ जनाको ज्यान गइसकेको छ । प्रभावित क्षेत्रका स्थानीयले वन्यजन्तु नियन्त्रण र क्षतिपूर्तिको व्यवस्था गर्न माग गर्दै आएका छन् । डिभिजन वन कार्यालयका प्रमुखले हात्तीले पुर्याएको क्षतिको समाधानका लागि पर्सा राष्ट्रिय निकुञ्ज र अन्य सम्बन्धित निकायसँग समन्वय गरी वन्यजन्तु नियन्त्रणका उपाय अपनाउने जानकारी दिए ।
साथै, बस्तीलाई सुरक्षित राख्न संयुक्त गस्तीको व्यवस्था गरिएको छ । क्षतिपूर्ति उपलब्ध गराउन कानुनी प्रक्रिया जटिल भएको र आवश्यक कागजात अभावका कारण धेरैजसो स्थानीयले सहयोग पाउन नसकेको जनाइएको छ ।
