धनगढी । कैलालीमा हुलाकी राजमार्ग स्तरवृद्धिका लागि २०७७ सालमा ठेक्का सम्झौता भएको थियो । धनगढी र लम्की क्षेत्रमा चार लेन र बाँकी क्षेत्रमा दुई लेनको राजमार्ग निर्माणको काम जारी छ ।
धनगढी क्षेत्रको तीन किलोमिटर चार लेनको काम सकिए पनि कालोपत्रे भएको एक वर्ष नहुँदै चिरा पर्नु र भत्किनु निर्माणको गुणस्तरमाथि गम्भीर प्रश्न उठाउँछ । राजमार्गका विभिन्न स्थान, जस्तै क्याम्पस चोक, बुद्धचोक, मनहेरा, कालिका मन्दिर र जंगल क्षेत्रका सडकमा समस्या देखिएको छ ।
धनगढीको पूर्वी क्षेत्रमा कालोपत्रे गरिएको राजमार्गको अवस्था बारे अनुगमन गर्ने योजना कार्यालयका प्रमुखले बताए । तर, उनले अहिलेसम्म स्थलगत निरीक्षण नगरेको उल्लेख गरेका छन् ।
धनगढीमा तीन किलोमिटर चार लेनको राजमार्ग निर्माण भएपनि, निर्माणको गुणस्तर परीक्षण सार्वजनिक नगरी चिरा परेको सडकमा टालटुल गरेर हस्तान्तरणको तयारी भइरहेको छ ।
धनगढीदेखि कटैनीसम्म र कान्द्रा नदीदेखि सत्तीसम्मका खण्डमा गरिएको निर्माण कमजोर रहेको र पुनः कमसल कालोपत्रे गरिएको जनाइएको छ । चार लेनका सडकमा मिडियनसहित फुटपाथ निर्माणको योजना भएपनि, कामको गुणस्तरमा सुधारको खाँचो देखिएको छ ।
राजमार्गको समयमा सम्पन्न नहुनु र गुणस्तरहीन निर्माणले आगामी दिनमा थप चुनौती सिर्जना गर्ने देखिन्छ । स्थलगत अनुगमन र गुणस्तरमा ध्यान दिन सम्बन्धित निकायलाई स्थानीयले दबाब दिएका छन् ।
