मोरङ । २१ असोज साँझ मोरङको लेटाङ नगरपालिका २ स्कूलचोककी १३ वर्षीया अंशु गौतमको हत्या आरोपमा छिमेकी ५५ वर्षीय पदम बहादुर अधिकारी पक्राउ परेका छन् । लामो समयदेखि जारी अनुसन्धानपछि प्रहरीले उनलाई पत्ता लगाएको हो । प्रहरीले आइतबार बिहान ११ बजे पत्रकार सम्मेलन गरी घटनामा संलग्न व्यक्तिलाई सार्वजनिक गर्ने तयारी गरेको छ ।
घटना कसरी भयो ?
अंशु घर नजिकै पिङ खेलेको स्थानबाट २१ असोज बेलुका बेपत्ता भएकी थिइन् । उनी साँझ साढे ५ बजेसम्म छिमेकी तथा स्थानीयले देखेका थिए । त्यसपछि उनी घर फर्किन नसकेपछि स्थानीयवासीले खोजतलास थाले ।
बेपत्ता भएको १८ दिनपछि बेलबारी–चिसाङ साझेदारी वन क्षेत्रमा दाउरा खोज्न गएका व्यक्तिहरुले किशोरीको शव फेला पारे । घटनास्थलमा भेटिएको सामग्रीका आधारमा परिवारले पहिचान गरेका थिए, र पछिल्लो डीएनए परीक्षणले पनि त्यही पुष्टि गर्यो ।
अनुसन्धानमा जटिलता
शव धेरै समयपछि फेला परेको हुँदा प्रहरीले अनुसन्धानमा चुनौती रहेको बताएको छ । घटनाको प्रकृति बारे प्रारम्भिक रूपमा प्रहरीले बल प्रयोगसहितको अपराध भएको आशंका गरिएपनि तथ्य प्रमाण जुटाउन समय लागेको जनाइएको छ ।
अंशुसँग मोबाइल फोन नभएको, र उनी घरदेखि केही दूरीमा रहेको पिङसम्म गएको मात्र पुष्टि भएको थियो । बेपत्ता भएको सूचना सार्वजनिक भएपछि प्रहरी, स्थानीयवासी र सामाजिक सञ्चालमार्फत व्यापक खोजी गरिएको थियो ।
परिवारको पीडा
कानुनी कारबाही अघि नबढेसम्म न्याय माग्दै परिवारले शव बुझ्न अस्वीकार गरेका छन् । यही कारण अंशुको शव १३ दिनदेखि बीपी कोइराला स्वास्थ्य विज्ञान प्रतिष्ठान, धरानमै राखिएको छ ।
अभियुक्त भारततिर भागेको आशंका
शव फेला परेपछि अधिकारी भारत गएको खुलेको छ । निरन्तरको प्रयासपछि प्रहरीसँगै समन्वय गरी उनलाई नेपाल ल्याएर पक्राउ गरिएको स्रोतहरू बताउँछन् । बालिकाको खोजीका क्रममा समुदायसँगै हिँड्ने व्यक्ति नै पछि संदिग्ध देखा परेपछि स्थानीयहरू स्तब्ध बनेका छन् ।
प्रहरीको विस्तृत अनुसन्धान
घटनापछि मोरङका एसपी कवित कटवाल, डीएसपी कोपिला चुडालसहितको टोली लगातार घटनास्थल पुगेर अनुसन्धानमा सक्रिय रह्यो । प्रदेश प्रहरी कार्यालय र केन्द्रीय अनुसन्धान ब्युरोको टोलीले समेत प्राविधिक अनुसन्धान, मोबाइल टावर विश्लेषण, स्थानीयसँग सोधपुछ लगायत विधि अपनाउँदै अनुसन्धान अघि बढाएको थियो ।
प्रहरीका अनुसार शव फेला परेका समयको अवस्थाका कारण घटना पुष्टि गर्न समय लागेको हो । सबै प्रमाण र विश्लेषणपछि प्रहरीले अन्तत: दोषी पहिचान गर्न सफल भएको बताएको छ ।
स्थानीयको चिन्ता र अभियुक्त सार्वजनिक
कञ्चनपुरकी निर्मला पन्तको हत्या प्रकरणजस्तै यो घटनामा पनि अपराधी पत्ता नलाग्ने हो कि भनी स्थानीयमा चिन्ता थियो । तर, लामो अनुसन्धानपछि पक्राउ परेका अधिकारीलाई आइतबार सार्वजनिक गर्दै प्रहरीले थप जानकारी दिनेछ ।
