सिरहा । सिरहा जिल्ला सदरमुकामस्थित जिल्ला अदालत बार एसोसिएसनको कार्यालय रहेको भवनमा बम विष्फोट भएको छ । विष्फोटमा परेर एक जना सहयोगी घाइते भएका छन् ।
जिल्ला प्रहरी कार्यालयका प्रमुख उपरीक्षक वासुदेव पाठकका अनुसार बार एसोसिएसनको भवनमा सटर लिएर ल फर्म चलाइरहेको कानुन व्यवसायी अधिवक्ता मकसुदन यादको ‘ल फर्मम’मा विष्फोट भएको हो ।
विष्फोटमा फर्ममा काम गर्ने ३५ वर्षीय सहयोगी सौरभ यादवको हात खुट्टामा चोट लागेको छ । चोट लागेका यादवको प्रादेशिक अस्पताल सिरहामा उपचार भइरहेको छ ।
विष्फोट भएको ठाउँमा कुनै पर्चा पम्पलेट फेला नपरेकोले विष्फोट कसले किन गराएको यकिन नभएको प्रहरी प्रमुख पाठकले बताए । सुतली बम हो कि अन्य कुनै बम हो यस बारे यकिन नभएको बताउँदै उनले विष्फोट गराउने समूहको खोजीमा प्रहरी लागि सकेको जानकारी दिए ।
Advertisement
