रौतहट । रौतहटका प्रमुख जिल्ला अधिकारी (सिडिओ) दिनेश सागर भुसालको सरुवा भएको छ । गृह मन्त्रालयले भुसाललाई सहसचिवका रूपमा गृह मन्त्रालय, सिंहदरबारमा सरुवा गरेको हो । उनको स्थानमा पर्वतका प्रमुख जिल्ला अधिकारी लक्ष्मीप्रसाद पौडेललाई रौतहटको जिम्मेवारी दिइएको छ ।
गृह मन्त्रालयले भदौ १८ गते गरेको निर्णयअनुसार विभिन्न जिल्ला प्रशासन कार्यालय तथा मन्त्रालयमा कार्यरत २३ जना सहसचिव तथा उपसचिव तहका कर्मचारीको सरुवा तथा पदस्थापन गरेको हो ।
छोटो कार्यकालमै छाडे प्रभाव
रौतहटमा सिडिओका रूपमा भुसालको कार्यकाल लामो नभए पनि प्रशासनिक सक्रियता, सुरक्षा समन्वय तथा सामाजिक सद्भाव कायम गर्ने प्रयासका कारण उनको कार्यकाल चर्चामा रह्यो ।
उनले २०८२ फागुन २१ गते सम्पन्न प्रतिनिधिसभा निर्वाचन शान्तिपूर्ण रूपमा सम्पन्न गराउन प्रशासनिक संयन्त्रको नेतृत्वदायी भूमिका निर्वाह गरेका थिए । निर्वाचनका क्रममा सुरक्षा निकाय, स्थानीय तह, राजनीतिक दल तथा अन्य सरोकारवालाबीच समन्वय कायम गर्न उनले विशेष जोड दिएका थिए ।
रौतहटमा समय–समयमा देखिने साम्प्रदायिक तथा सामाजिक विवादका क्रममा पनि भुसालले संवाद र समन्वयलाई प्राथमिकता दिएको देखिएको थियो । संवेदनशील परिस्थितिमा प्रशासनिक निर्णयसँगै सामाजिक संवेदनशीलतालाई समेत ध्यान दिएर अघि बढ्नु उनको कार्यशैलीको सकारात्मक पक्षका रूपमा लिइएको छ ।
जिल्लामा शान्ति सुरक्षा कायम गर्नुका साथै स्थानीय तह, नागरिक समाज र सुरक्षा निकायबीच समन्वय बढाउने तथा समस्या उत्पन्न हुनुअघि नै सम्बन्धित पक्षसँग छलफल गर्ने प्रयास उनले गरेका थिए ।
विपद् व्यवस्थापन, सुरक्षा समन्वय तथा प्रशासनिक सेवा प्रवाहमा समेत उनले सक्रियता देखाएका थिए । सामाजिक तथा धार्मिक विविधता रहेको रौतहटमा शान्ति सुरक्षा र सामाजिक सद्भाव कायम राख्नु प्रशासनका लागि चुनौतीपूर्ण मानिन्छ । यही चुनौतीबीच विवादित विषयमा संवाद र समन्वयलाई प्राथमिकता दिनु भुसालको कार्यकालको उल्लेखनीय पक्षका रूपमा लिइएको छ ।
नयाँ सिडिओ पौडेलसामु चुनौती
अब रौतहटको प्रशासनिक नेतृत्व सम्हाल्न आउन लागेका लक्ष्मीप्रसाद पौडेल सामु जिल्लाको शान्ति सुरक्षा, सुशासन, सेवा प्रवाह तथा प्रशासनिक व्यवस्थापनलाई प्रभावकारी बनाउने चुनौती रहनेछ ।
विशेष गरी सामाजिक तथा धार्मिक संवेदनशीलता रहेको रौतहटमा सम्भावित विवादलाई समयमै पहिचान गरी राजनीतिक दल, स्थानीय तह, नागरिक समाज तथा सुरक्षा निकायसँग प्रभावकारी समन्वय गर्नु पौडेलका लागि महत्वपूर्ण जिम्मेवारी हुनेछ ।
भुसालले अघि बढाएको संवाद, समन्वय तथा सामाजिक सद्भावको अभ्यासलाई निरन्तरता दिँदै प्रशासनिक सेवा प्रवाहमा थप सुधार ल्याउनु पौडेलका प्रारम्भिक प्राथमिकताका विषय बन्ने देखिन्छ ।
उता, गृह मन्त्रालयमा सहसचिवका रूपमा जिम्मेवारी सम्हाल्न लागेका भुसालले रौतहटमा प्राप्त गरेको प्रशासनिक अनुभवलाई मन्त्रालयस्तरको जिम्मेवारीमा कसरी उपयोग गर्छन् भन्ने विषय पनि चासोका रूपमा हेरिएको छ ।
