रौतहट । सात वर्षअघि आजकै दिन वीरगञ्जकी मुस्कान खातुनमाथि भएको एसिड आक्रमणले उनको जीवनमा गहिरो पीडा र संघर्षको अध्याय सुरु गरेको थियो । आक्रमणबाट उनको अनुहारमा गम्भीर चोट पुग्यो भने त्यसपछि लामो समयसम्म उपचार, शारीरिक पीडा, मानसिक तनाव र सामाजिक चुनौतीको सामना गर्नुपर्यो ।
तर मुस्कानले त्यो पीडालाई आफ्नो कमजोरी बन्न दिइनन् । बरु समयसँगै त्यही संघर्षलाई आफ्नो शक्ति र साहसमा परिणत गर्दै अघि बढिन् । एसिड आक्रमण भएको सात वर्ष पुगेको दिन शुक्रबार उनले सामाजिक सञ्जाल फेसबुकमार्फत आफ्नो विगत सम्झँदै भावुक अभिव्यक्ति सार्वजनिक गरेकी छन् ।
‘आज भाद्र २० गते । आजकै दिन सात वर्षअघि मेरो जीवनमा त्यो कालो दिन आएको थियो, जुन दिन ममाथि एसिड आक्रमण भएको थियो,’ उनले लेखेकी छन् । उनका लागि उक्त घटना केवल एउटा पीडादायी क्षण मात्र थिएन, त्यसले जीवनको बाटो नै परिवर्तन गरिदिएको थियो ।
अनुहारमा परेको एसिडको चोटसँगै उनले उपचारका कठिन चरण पार गर्नुपर्यो । शारीरिक पीडासँगै समाजको दृष्टिकोण र मानसिक संघर्ष पनि उनको यात्राको हिस्सा बने । यद्यपि, मुस्कान त्यही पीडामा रोकिइनन् । उनले विगतलाई स्वीकार गर्दै त्यसबाट अघि बढ्ने प्रयास जारी राखिन् ।
‘त्यो घटना मेरो जीवनमा कहिल्यै नमेटिने पीडा र सम्झना बनेर बसेको छ । तर मैले त्यो पीडालाई आफ्नो कमजोरी बन्न दिइनँ,’ उनले आफ्नो पोस्टमा उल्लेख गरेकी छन् । मुस्कानका अनुसार जीवनमा आफूले चाहेका सबै कुरा र सबै मानिस सधैँ साथमा रहँदैनन् । कतिपय घटना र पीडा जीवनको हिस्सा बनेर आउँछन् । तर त्यस्ता कठिन परिस्थितिका बाबजुद पनि मानिसले आफ्नो जीवनलाई पुन: सुन्दर बनाउन सक्ने उनको विश्वास छ ।
उनले त्यसका लागि हिम्मत, आत्मविश्वास र निरन्तर प्रयास आवश्यक रहेको बताएकी छन् । सात वर्षअघिको घटना सम्झिँदा अहिले आफू पहिलेभन्दा कमजोर नभई अझ बलियो भएको महसुस हुने मुस्कानले बताएकी छन् । ‘मेरो विगत मेरो पहिचान होइन; मेरो संघर्ष, मेरो साहस र मेरो यात्रा नै मेरो पहिचान हो,’ उनले लेखेकी छन् ।
एसिड आक्रमणको पीडादायी सम्झना अझै ताजा भए पनि आफू त्यो पीडाभन्दा धेरै अगाडि आइसकेको उनको भनाइ छ । उनले जीवनमा आफू रोकिएकी नभई निरन्तर अघि बढिरहेको सन्देश दिएकी छन् । ‘म रोकिएकी छैन, म अझै अघि बढिरहेकी छु,’ उनले आफ्नो पोस्टको अन्त्यमा लेखेकी छन् ।
मुस्कानको यो अभिव्यक्ति उनको व्यक्तिगत संघर्षको कथा मात्र होइन, हिंसाले जीवनमा गहिरो असर पारे पनि साहस, आत्मविश्वास र निरन्तर प्रयासका माध्यमबाट जीवनलाई पुन: अर्थपूर्ण बनाउन सकिन्छ भन्ने सन्देश समेत हो । उनको संघर्ष र दृढताले एसिड आक्रमण तथा अन्य हिंसाबाट प्रभावित व्यक्तिहरूलाई अघि बढ्न प्रेरणा दिने आधार बनेको छ ।
