सर्लाही । गएरातिदेखि परेको निरन्तरको भारी वर्षाका कारण सर्लाही सदरमुकाम मलंगवा डुबानमा परेको छ । निरन्तर वर्षाका कारण बजार क्षेत्रका सडक तथा गल्लीहरूमा पानी जमेको छ ।
मुख्य बजार क्षेत्रका पसल, सरकारी कार्यालय तथा आवासीय घरहरूमा पानी पस्दा स्थानीयको दैनिक जनजीवन प्रभावित भएको छ । सडकहरू जलमग्न भएपछि सवारी साधनको आवागमनमा समेत समस्या देखिएको छ ।
पैदलयात्रुलाई आवतजावत गर्न कठिनाइ भएको छ भने कतिपय स्थानमा सडक र आसपासका क्षेत्र जलमग्न हुँदा स्थानीयलाई आवतजावतमा थप समस्या भएको छ ।
भारी वर्षा नरोकिएका कारण मलंगवाका अन्य क्षेत्र समेत थप डुबानमा पर्न सक्ने जोखिम बढेको छ । लगातारको वर्षाका कारण जलनिकासमा समस्या देखिएपछि सडक तथा बजार क्षेत्रमा पानीको निकास हुन सकेको छैन ।
डुबानका कारण व्यापारिक गतिविधि प्रभावित हुनुका साथै सर्वसाधारणलाई दैनिक कामकाज सञ्चालन गर्न समेत कठिनाइ भएको छ । वर्षा निरन्तर भइरहेकाले स्थानीयवासीलाई आवश्यक सावधानी अपनाउन आग्रह गरिएको छ ।
