सर्लाही । गर्मी बढेपछि सर्लाहीका सामुदायिक विद्यालयमा चार दिनका लागि बिदा दिइएको छ । शिक्षा‚ विकास तथा समन्वय इकाई सर्लाहीले बिदा दिने निर्णय गरेको हो । कतिपय स्थानीय तहले पनि बिदाको घोषणा गरेका छन् ।
समन्वय इकाई तथा पालिकाले गर्मीका कारण बालबालिकामा गम्भीर असर परेको भन्दै जेठ २४ गतेसम्मका लागि विद्यालय बिदा दिइएको जनाएको छ ।
इकाईका निमित्त प्रमुख अशोककुमार रौनियार तथा विभिन्न नगरपालिकाका प्रमुख प्रशासकीय अधिकृतहरूद्वारा प्रकाशित सूचनामा बर्खे बिदाबाट कट्टा हुने गरी जिल्ला तथा नगर क्षेत्रका सामुदायिक तथा संस्थागत विद्यालयमा बिदा दिइएको उल्लेख छ ।
विद्यालय बिदा भएपछि विद्यार्थीहरू बिहानै घर फर्किएका थिए । पछिल्ला केही दिनदेखि बढ्दै गएको गर्मीको कारण जनजीवन कष्टकर बन्दै गएको छ । बिहान सबेरैदेखि सुरु हुने गर्मी मध्याह्नसम्म ४४ डिग्रीसम्म तापक्रम पुग्ने गरेकाले जनजीवन समेत प्रभावित बनेको छ ।
