बारा । जीतपुरसिमरा उपमहानगरपालिकाका चार वटा वडामा व्यवसायिक गोलभेंडा खेती गर्दा बजार नपाउँदा किसानहरू चिन्तित बनेका छन् । उपमहानगरपालिका ११, १२, १९ र २० का सिसनिया, फत्तेपुर, इनर्वासिरा र कञ्चनपुरमा सय बिघा बढी खेतमा यस पटक गोलभेंडा खेती गरिएको छ ।
एक किसानले इजरायलबाट कृषि कार्यमा तालिम लिई नेपालमा सोही अनुसारको खेती थालेको भएपनि लाखौंको घाटा ब्यहोर्नु परेको बताएका छन् । उनले चार बिघामा गोलभेंडा खेती गरेपनि अहिले बजारमा डेढ रुपैयाँ प्रति किलोमा बिक्री भइरहेको र व्यापारीहरूले चासो नदेखाउँदा गोलभेंडा खेतमै सड्दै गएको बताए ।
किसानका अनुसार, २० लाख रुपैयाँको लगानी गर्दा अहिलेसम्म आठ लाखभन्दा बढीको गोलभेंडा मात्र बिक्री भएको छ । बजारमा गोलभेंडा बेच्नका लागि व्यापारीहरू कम मूल्यमा खरीद गर्न आएका छन्, जसले गर्दा किसानको लागत पूरा हुने अवस्था छैन ।
अर्का एक किसानले पाँच बिघामा रु २७ लाख लगानी गरेको भएपनि अहिलेसम्म त्यति रकम ननिस्केको बताएका छन् । उनले नेपालमा उत्पादन भएका गोलभेंडा भित्रन नसकेको समस्या र भारतबाट अवैध रुपमा आयात भइरहेको गोलभेंडाका कारण बजार नपाउने समस्या रहेको बताए ।
यसैगरी, किसानहरूको अनुसार, यदि सरकारले अवैध पैठारीलाई नियन्त्रण नगरेको खण्डमा आगामी वर्ष गोलभेंडा खेतीमा लगानी गर्न किसानहरू निरुत्साहित हुनेछन्, जसले गर्दा कृषि क्षेत्रका धेरैलाई बेरोजगार बनाउने डर छ । गोलभेंडा खेती भदौ महिनामा बिरुवा तयार गरेर असोजमा रोपिन्छ र मङ्सिरको अन्तिमदेखि वैशाखसम्म उत्पादन हुने अनुमान गरिएको छ ।
यस वर्ष मङ्सिर महिनामा गढीमाई मेला लागेकोले हरिया तरकारीहरूको मूल्य आकाशिएको थियो, तर मेला समाप्त भएपछि किसानहरूको उत्पादन बजारमा एकै पटक आउँदा पुसको पहिलो सातादेखि मूल्य ह्वात्तै घटेको छ । काउली, बन्दाकोभी, आलु, हरियो केराउ जस्ता तरकारीहरूको मूल्य घटेको र कतिपय स्थानमा किसानहरूले उत्पादन खेतमै सड्दै गरेको देखिएको छ ।
