एजेन्सी । अभिनेता विक्रान्त मेस्सीले अभिनयबाट संन्यास लिने घोषणा गरेपछि बलिउडमा हलचल मचेको छ । उनले इन्स्टाग्राममा लेखेका छन् कि पछिल्ला केही वर्षहरू अद्वितीय रहे, तर अब परिवार र जीवनका अन्य पहलुहरूमा ध्यान दिन चाहन्छु । उनका अनुसार, सन् २०२५ मा उनले दुई फिल्महरू ‘यार जिग्री’ र ‘आंखोकी गुस्ताखियाँ’बाट आफ्नो अभिनय यात्रा समेट्नेछन् ।
मेस्सीको संन्यासको कारणको बारेमा विभिन्न अनुमानहरू छन् । एक प्रमुख कारण उनका पछिल्ला फिल्म ‘साबरमती रिपोर्ट’मा समेटिएको संवेदनशील विषय हो, जसले उनलाई धम्की र ट्रोलिङको सामना गराएको थियो । मेस्सीका अनुसार, यो विवादले उनको छोरालाई समेत प्रभावित गर्यो, जसका कारण उनले आफ्नो परिवारको सुरक्षा बारे चिन्ता व्यक्त गरेका छन् ।
कसैले भने संन्यासलाई फिल्म प्रचारको रणनीति भनेर पनि व्याख्या गरेका छन्, जसले दर्शकहरूको जिज्ञासा र फिल्मको प्रति चासो बढाउन सक्छ । विक्रान्तका फ्यानहरूले भने यस निर्णयको बारेमा शंका पनि गरेका छन्, र भविष्यमा यो निर्णय फेरिन सक्ने अड्कल गरेका छन् ।
मेस्सीले २०१३ मा ‘लुटेरा’ फिल्मबाट डेब्यू गरेका थिए र टेलिभिजन शो ‘बालिका बधु’बाट लोकप्रियता प्राप्त गरेका थिए । ‘टुवेल्थ फेल’ फिल्मले उनलाई थप सम्मान र प्रतिष्ठा दिलायो । मेस्सीको संन्यासको यो अचानक निर्णयले भने बलिउडमा नयाँ चर्चा सिर्जना गरेको छ ।
