एजेन्सी । बलिउड अभिनेत्री अदिति राव हैदरी र अभिनेता सिद्धार्थ विवाह बन्धनमा बाँधिएका छन् । तेलंगानाको ४०० वर्ष पुरानो श्रीरंगपुर मन्दिरमा उनीहरूले गोप्य रूपमा विवाह गरेका हुन् ।
यस समारोहमा परिवारका सदस्यहरू मात्र सहभागी थिए, जसलाई भारतीय मिडियाहरूले पुष्टि गरेका छन् । विवाहपछि अदिति र सिद्धार्थले आफ्नो विवाहका तस्बिरहरू सामाजिक सञ्जालमा सेयर गरेका छन् ।
सन् २०२१ मा एकसाथ काम गरेपछि सिद्धार्थ र अदितिको सम्बन्ध नजिकिएको थियो। उनीहरूले तमिल-तेलुगु फिल्म महासमुद्रममा सहकार्य गरेका थिए, जसपछि उनीहरूबीचको निकटता बढेको हो ।
सिद्धार्थले बलिउडमा रंग दे बसन्ती र चश्मे बद्दूर जस्ता चर्चित फिल्महरूमा काम गरेका छन् । अदिति राव हैदरी दक्षिण र हिन्दी चलचित्रकी चर्चित अभिनेत्री हुन्, जसले पद्मावत, रकस्टार, बोस र मर्डर-३ जस्ता फिल्महरूमा अभिनय गरेकी छिन् ।
अदिति शाही परिवारसँग सम्बन्धित छिन् । २८ अक्टोबर १९८६ मा हैदराबादमा जन्मिएकी अदिति हैदराबादकी निजाम थिइन् र उनी साहेल अकबर हैदरीकी नातिनी हुन् । अदितिका हजुरबुवा राजा जे रामेश्वर राव तेलंगानाको वानापार्टीका राजा थिए ।
अदितिले आफ्नो करियर भरतनाट्यम नृत्यबाट सुरु गरेकी थिइन् र प्रसिद्ध नर्तकी लीला सैमसनको समूहमा पनि काम गरेकी थिइन् । पछि, उनले २००७ मा तमिल फिल्म श्रृंगाराम मार्फत अभिनयमा पाइला राखेकी थिइन् ।
सिद्धार्थ र अदिति दुवैको यो दोस्रो विवाह हो । सिद्धार्थको पहिलो विवाह सन् २००३ मा मेघनासँग भएको थियो, तर २००७ मा उनीहरू अलग भएका थिए । त्यस्तै, अदितिको पहिलो विवाह अभिनेता सत्यदीप मिश्रसँग २१ वर्षको उमेरमा भएको थियो, तर चार वर्षपछि उनीहरूको सम्बन्धविच्छेद भएको थियो ।
