रौतहट । रौतहटस्थित लामो समयदेखि अलपत्र रहेको बागमती नदीको पुल र लालबकैया नदीको पुल निर्माणका लागि संघीय सरकारको तीन जना मन्त्रीहरुको ध्यानाकर्षण गराइएको छ । उपप्रधानमन्त्री तथा अर्थमन्त्री विष्णु पौडेल, भौतिक पुर्वाधार मन्त्री देवेन्द्र दहाल तथा शिक्षा मन्त्री विधा भट्टराईसँग रौतहट जिल्लाको अधुरो पुलहरुको निर्माण तथा बजेट बिनियोजन लगायत जिल्लाका विकास सम्बन्धि विशेष छलफल भएको हो ।
पूर्वमन्त्री तथा नेकपा एमालेका नेता महेश बस्नेतको नेतृत्वमा मंगलबार सिंहदरबार गएका रौतहटका नेताहरुसहितको टोली पालो पालो तीनै जना मन्त्रीसँग भेटेर दुवै पुल निर्माणका लागि ध्यानाकर्षण गराएको टोलीमा सहभागी एमाले केन्द्रिय सदस्य अजय कुमार गुप्ताले बताए । भेटको क्रममा अर्थ मन्त्रीसहितका मन्त्रीहरु माग प्रती सकारात्मक रहेको केन्द्रिय सदस्य गुप्ताले जानकारी दिए ।
लामो समयदेखि अलपत्र परेको वडहरवाघाट स्थित बागमती नदीको पुल र गौर नगरपालिका ४ टिकुलिया स्थित लाल बकैया नदीको पुल लगायत अन्य निर्माणाधीन पुलहरु र सडक निर्माणको सन्दर्भमा विशेष छलफल भएको सहभागी अर्का नेता एमाले केन्द्रीय लेखा समिति सदस्य राजकिशोर प्रसाद यादवले बताएका छन् ।
टोलीमा एमाले नेता महेश बस्नेत, एमाले केन्द्रीय सदस्य तथा संघीय सांसद प्रत्याशी अजय कुमार गुप्ता लगायतको सहभागिता रहेको थियो । तत्कालीन प्रधानमन्त्री सुशील कोइरालाले शिलान्यास गरेको लालबकैया नदीको पुल र तत्कालिन प्रधानमन्त्री माधव कुमार नेपालले शिलान्यास गरेको बागमती नदीको पुल ठेकदारको बदमासिको कारण एक दशक भन्दा बढी समयदेखि अलपत्र परेको छ । दुवै पुल निर्माणको लागि पटक पटक विभिन्न संघर्षको कार्यक्रम हुँदै आएपनि अधुरो पुलको अवस्था ज्युँका त्यूँ रहेको छ ।
