काठमाडौं । संघीय मामिला तथा सामान्य प्रशासन मन्त्रालयको निर्णयले जीतपुरसिमरा उपमहानगरपालिकामा दुई जना प्रमुख प्रशासकीय अधिकृत खटाउँदा विवाद उत्पन्न भएको छ । वैशाख २० गते मात्र उर्मिला काफ्लेलाई प्रमुख प्रशासकीय अधिकृतको जिम्मेवारी दिइएकोमा, २७ भदौमा मन्त्रीस्तरीय निर्णयबाट अर्को प्रमुख प्रशासकीय अधिकृत खटाइएपछि यो विवाद झन चर्किएको हो ।
माओवादीबाट निर्वाचित मेयर राजन पौडेल र बहुसंख्यक एमाले जनप्रतिनिधिहरूको बीचमा यो विवादको पृष्ठभूमि छ । प्रमुख प्रशासकीय अधिकृत मेयरप्रति उत्तरदायी हुनुपर्ने भन्दै मन्त्रालयले साउनमै उर्मिला काफ्लेलाई फिर्ता बोलाएको थियो ।
तीन महिना मात्र भएको काफ्लेको सरुवा मन्त्रालयको आफ्नै नियम विपरीत भएको भन्दै काफ्ले अदालत पुगेकी थिइन् । सर्वोच्च अदालतले साउन ९ मा अर्को आदेश नभएसम्म सरुवा कार्यान्वयन नगर्न आदेश दिएपछि काफ्ले आफ्नो जिम्मेवारीमा पुनः फर्किएकी थिइन् ।
यस मुद्दाको सुनुवाइ असोज ६ गते तोकिएको भए पनि सुनुवाइ स्थगित भएको छ । यसैबीच, काफ्लेको अमेरिका भ्रमण पनि संघीय मामिला मन्त्रीले रद्द गरिदिएका छन् । असोज ४ मा सहसचिवहरूको सरुवा हुँदा वीरन्द्रदेव भारतीलाई जीतपुरसिमरामा प्रमुख प्रशासकीय अधिकृतका रूपमा पठाइएको छ, जसले अदालतको अवहेलनाको आरोप निम्त्याएको छ ।
अदालतले प्रधानमन्त्री तथा मन्त्री परिषदको कार्यालयसँग लिखित जवाफ माग गरेको छ । नगर प्रमुख राजन पौडेलले सहसचिव भारतीलाई पत्र लेख्दै अदालतमा मुद्दा विचाराधीन रहेको अवस्थामा जीतपुरसिमरामा हाजिर नहुन अनुरोध गरेका छन्, ताकि अदालतको अवहेलनाको आरोप नलागोस् ।
