काठमाडौं । निरन्तर वर्षाका कारण मकवानपुरको कुलेखानी जलविद्युत् केन्द्रको जलाशय पूर्ण रुपमा भरिएको छ । पानीको सतह अत्यधिक बढेपछि शनिबार बिहान ५:४५ बजेबाट बाँधका दुईवटा ढोका (गेट) आंशिक रूपमा खोलिएको छ, जसबाट पानी स्पिल वेबाट बाहिर जान थालेको छ ।
शुक्रबारदेखि नै ६० मेगावाटको विद्युत्गृहलाई पूर्ण क्षमतामा सञ्चालन गरिएको थियो । अविरल वर्षाका कारण जलाशयको पानीको तह समुद्र सतहबाट १५३०.९३ मिटर पुगेको छ, जसले गर्दा जलाधार क्षेत्रको पानी भण्डारण क्षमता भरिएको हो ।
केन्द्रका प्रमुख तारादत्त भट्टका अनुसार जलाशयको पानीको तह १५३०.३५ मिटर पुगेपछि ढोका आंशिक रूपमा खोल्नुपर्ने भएको हो । निरन्तरको वर्षा र हावाहुरीका कारण ढोका पूर्ण रुपमा खोल्नुपर्ने अवस्था आउने सम्भावना रहेको पनि भट्टले बताए ।
बाँधका ढोका आंशिक रूपमा खोलिएकाले बागमती नदीको बहावमा वृद्धि हुने सम्भावना छ, जसले तल्लो तटीय क्षेत्रका स्थानीय बासिन्दालाई उच्च सतर्कता अपनाउन केन्द्रले आग्रह गरेको छ ।
