सप्तरी । सप्तरीको डाक्नेश्वरी नगरपालिकाका दुई वडामा वडाअध्यक्ष पदका लागि मंसिर १६ गते हुने उपनिर्वाचनका क्रममा मदिराजन्य पदार्थको बिक्री, वितरण र सेवनमा रोक लगाइएको छ ।
प्रमुख जिल्ला अधिकारी भोला दाहालका अनुसार मतगणना सम्पन्न नहुन्जेलसम्मका लागि यो निर्णय लागू हुनेछ । स्थानीय प्रशासनले निर्वाचन सुरक्षाका लागि यो कदम चालेको हो । आदेश उल्लङ्घन गरे कानुनी कारबाही गरिने चेतावनी दिइएको छ ।
त्यस्तै, मंसिर १५ गते राति १२ बजेदेखि निर्वाचन सम्पन्न नभएसम्म अत्यावश्यक सवारी साधन बाहेक अन्य सवारी आवागमनमा रोक लगाइएको छ । निर्वाचन आचारसंहिता विपरीत कुनै गतिविधि गरे कानुनी कारबाही हुने प्रशासनले स्पष्ट पारेको छ ।
सुरक्षाको लागि व्यापक तयारी
मतदान स्थलमा शान्ति सुरक्षाका लागि २५० नेपाल प्रहरी परिचालन गरिएको जिल्ला प्रहरी प्रमुख ढकेन्द्र खतिवडाले जानकारी दिए । सशस्त्र प्रहरी र सेनाले पनि सुरक्षामा सघाउने बताए । मतदाताहरूलाई ढुक्क भएर मतदानमा सहभागी हुने वातावरण तयार पारिएको उनको भनाइ छ ।
निर्वाचन तयारी र मतदाता शिक्षा
जिल्ला निर्वाचन कार्यालयले मतदातालाई उपनिर्वाचन, यसको महत्त्व र मतदान प्रक्रिया बारे जानकारी दिन अभियान सञ्चालन गरेको छ । मुख्य निर्वाचन अधिकृतको कार्यालय मार्फत तीन मतदान स्थल र पाँच मतदान केन्द्र तोकिएको छ ।
उपनिर्वाचनको पृष्ठभूमि
डाक्नेश्वरी नगरपालिकाको वडा नं. १ र वडा नं. ४ का तत्कालीन वडाध्यक्षहरू, नेपाली कांग्रेसका प्रितमलाल चौधरी र हरिप्रसाद रायको निधनपछि यी पद खाली भएका थिए । उपनिर्वाचनमा विभिन्न राजनीतिक दलका १४ र एक स्वतन्त्र उम्मेदवारसहित १५ जना प्रतिस्पर्धामा छन् ।
वडा नं. १ मा २,६३५ र वडा नं. ४ मा १,२८१ मतदाता रहेका छन् । निर्वाचनलाई शान्तिपूर्ण रूपमा सम्पन्न गर्न स्थानीय प्रशासनले आवश्यक सुरक्षाका साथै मतदानको तयारी पूरा गरेको छ ।
