काठमाडौं । जापानको राजधानी टोकियोमा जारी ३२ औँ ग्रीष्मकालीन ओलम्पिक खेलकुदमा चीन ८७ पदकसहित शीर्ष स्थानमा कायमै रहेको छ । अमेरिका र जापानलाई उछिन्दै चीन शीर्ष स्थान ओगट्न सफल भएको हो ।
चीनले हालसम्म ३८ स्वर्ण, ३१ रजत र १८ कास्य पदक प्राप्त गरेको छ । अमेरिका दोस्रो तथा जापान तेस्रो स्थानमा रहेका छन् । अमेरिकाले ३६ स्वर्ण, ३९ रजत र ३३ कास्य पदक प्राप्त गरेको छ भने जापानले २७ स्वर्ण, १२ रजत र १७ कास्य प्राप्त गर्न सफल भएको छ ।
यसैगरी रसियन ओलम्पिक कमिटी पदक तालिकाको चौथो स्थानमा रहेको छ । उसले २० स्वर्ण, २६ रजत र २३ कास्य पदक प्राप्त गरेको छ । यस्तै बेलायत २० स्वर्ण, २१ रजत र २२ कास्य पदक प्राप्त गर्दै पाँचौं स्थानमा रहेको छ ।
अस्ट्रेलिया १७ स्वर्ण, ७ रजत र २२ कास्य पदकसहित छैटौँ स्थानमा छ । जर्मनी १० स्वर्ण, ११ रजत र १६ कास्यसहित सातौँ, नेदरल्याण्डस् १० स्वर्ण, ११ रजत र १२ कास्यसहित आठौँँ, इटली १० स्वर्ण, १० रजत र १९ कास्य जित्दै नवौँ तथा फ्रान्स ९ स्वर्ण, १२ रजत र ११ कास्यका साथ १० औँ स्थानमा रहेको छ ।
टोकियो ओलम्पिकमा सहभागी २०५ देशमध्ये हालसम्म ९३ देशले पदक प्राप्त गर्न सफल भएको टोकियो ओलम्पिकको वेबसाइटमा उल्लेख छ । नेपालबाट चार खेलमा पाँच खेलाडी टोकियो ओलम्पिकमा सहभागी भएका थिए ।
सुटिङकी कल्पना परियार, जुडोकी सोनिया भट्ट, पौडीका एलेक्स शाह र गौरिका सिंह तथा एथलेटिक्सकी सरस्वती चौधरीले आ–आफ्नो खेलमा प्रतिस्पर्धा गर्नुभएको थियो । पाँचै खेलाडी टोकियो ओलम्पिकबाट बाहिरिनुभएको छ ।
