काठमाडौं । अक्टोबरमा अमेरिकामा आयोजना हुने आइसिसी विश्वकप क्रिकेट लिग-२ को खेल तालिका सार्वजनिक भएको छ । यस सिरिजमा नेपाल, अमेरिका र स्कटल्याण्डबीच प्रतिस्पर्धा हुनेछ ।
नेपालले २७ अक्टोबर र २ नोभेम्बरमा स्कटल्याण्डसँग र २९ अक्टोबर र ४ नोभेम्बरमा अमेरिकासँग खेल्नेछ । सिरिजको अन्तिम खेल नेपाल र स्कटल्याण्डबीच ४ नोभेम्बरमा हुनेछ ।
नेपालले चार वटै खेल ह्युस्टनस्थित ग्रान्ड प्रेरिरी भ्यूमा खेल्नेछ । एकदिवसीय खेलपछि नेपाल, स्कटल्याण्ड र अमेरिकाले त्रिकोणात्मक टी-२० सिरिज पनि खेल्नेछन्, जसको तालिका भने अझै सार्वजनिक भएको छैन ।
अमेरिका भ्रमणअघि नेपालले क्यानडामा लिग-२ र त्रिकोणात्मक टी-२० सिरिज खेल्नेछ । लिग-२ अन्तर्गत नेपालले १६ र २२ सेप्टेम्बरमा क्यानडा र १८ र २४ सेप्टेम्बरमा ओमानसँग प्रतिस्पर्धा गर्नेछ ।
टी-२० सिरिजको अन्तर्गत, नेपालले क्यानडा र ओमानसँग २८ सेप्टेम्बर र १ अक्टोबर र २९ सेप्टेम्बर र २ अक्टोबरमा खेल्ने तालिका बनाएको छ । कुल १६ म्याच खेल्ने नेपालले लिग-२ मा हाल सातौं स्थानमा छ ।
गत फेब्रुअरीमा खेलेको सिरिजमा नेपालले चारमध्ये तीनमा हार र एकमा मात्र जित निकालेको थियो । नेपाली टिम क्यानडामा सुधारको लक्ष्य राख्दै अंक तालिकामा उन्नति गर्ने योजनामा छ ।
स्कटल्याण्ड दोस्रो, क्यानडा तेस्रो, अमेरिका पाँचौं र ओमान छैटौँ स्थानमा छ । सन् २०२७ सम्म लिग-२ मा हरेक टिमले समान ३६ म्याच खेल्नेछन्, जसमा शीर्ष चार टिमले सोझै एकदिवसीय विश्वकपमा स्थान बनाउनेछन् । पुछारका चार टिमले विश्वकप छनोट खेल्न क्वालिफायर प्लेअफमा प्रतिस्पर्धा गर्नेछन् ।
नेपालले गत संस्करणको लिग-२ मा तेस्रो स्थान प्राप्त गर्दै सिधैं एकदिवसीय विश्वकप छनोट खेलेको थियो । नेपालले यस पटक पनि उत्कृष्ट प्रदर्शन गर्दै सोझै एकदिवसीय विश्वकप छनोटमा स्थान बनाउने लक्ष्य राखेको छ ।
