रौतहट । प्रादेशिक अस्पताल गौरमा सोमबार अख्तियार दुरुपयोग अनुसन्धान आयोगको टोलीले छापा मारेको छ । टोलीले अस्पतालले खरिद गरेका औषधि र उपकरणहरूको परीक्षण गर्दै प्रमाण संकलन गरी मुचुल्का तयार पारेको छ । खरिद विवरण र उपलब्ध सामग्रीहरूमा मेल नखाएपछि अख्तियारले अनुसन्धान अघि बढाएको हो । टोली बा.एडि ९०६४ नम्बरको गाडीमा आएको थियो ।
अख्तियारको टोलीले अस्पतालमा भएका सामग्री र औषधिहरूको विवरणसँग मेल नमिलेपछि रिपोर्ट तयार पारेको छ । यस क्रममा स्टोर किपर राम अश्रेय मुखियासँग सोधपुछ समेत गरिएको थियो । टोलीका सदस्यहरूले सञ्चारकर्मीहरूलाई कुनै पनि जानकारी दिन अस्वीकार गरेका थिए ।
अस्पतालमा लामो समयदेखि भ्रष्टाचार र अनियमितताको आरोप लगिँदै आएको छ । अस्पताल विकास समितिका अध्यक्ष अनवर हासमी र मेडिकल सुपरिटेन्डेन्ट मुरारी ठाकुरले गोप्य टेन्डरमार्फत औषधि र उपकरण खरिद गरी ठूलो आर्थिक अनियमितता गरेको आरोप लागेको छ ।
अस्पतालमा टाइल्स र मार्बल जडान, गाडी मर्मत, टिकट काउन्टरको रकम हिनामिना, भवन रंगरोगन, इन्धन खर्च, न्यानो झोला खरिद, र करार कर्मचारी भर्ना प्रक्रियामा समेत अनियमितता भएको जनाइएको छ ।
स्रोतका अनुसार, निजी क्लिनिक र ल्याबसँगको साठगाँठमार्फत लाखौं रुपैयाँको भ्रष्टाचार भइरहेको छ । यी गतिविधिका कारण अस्पतालका चिकित्सकहरू दबाबमा काम गर्न बाध्य भएको बताइन्छ । डा. अमित चौधरीका अनुसार, अध्यक्ष हासमीले चिकित्सकहरूलाई सरुवा गर्ने धम्की दिँदै उनीहरूलाई दबाबमा राख्ने गरेका छन् ।
स्थानीय बासिन्दाहरूले पटक पटक सम्बन्धित निकायको ध्यानाकर्षण गराउँदा पनि ठोस कारबाही नभएको गुनासो गरेका छन् । अध्यक्ष हासमीले भने अनियमितता नभएको दाबी गरेका छन् ।
यस घटनाले अस्पतालको साखलाई ठूलो धक्का दिएको छ, र अख्तियारको थप अनुसन्धानले दोषीहरूलाई कारबाही गर्ने अपेक्षा गरिएको छ । टोली कहाँबाट आएको थियो र कति सदस्यहरू थिए भन्ने बारे स्पष्ट जानकारी दिइएको छैन ।
