एजेन्सी । भारतको बेंगलुरुमा एक ३४ वर्षीय एआई इन्जिनियर अतुल सुभाषले अनौठो कारणले आत्महत्या गरेको घटना सार्वजनिक भएको छ । उनले आफ्नी श्रीमती र सासुको दुव्र्यवहार तथा पैसाको निरन्तर मागका कारण आत्महत्या गर्न बाध्य भएको बताएका छन् ।
गत डिसेम्बर ९ मा उनले १ घन्टा २० मिनेटको भिडियो र २४ पृष्ठ लामो सुसाइड नोट लेख्दै आफ्नो जीवन समाप्त गरेका थिए । सुसाइड नोटमा उनले आत्महत्या बाहेक अर्को विकल्प नभएको र आफ्नो मृत्युपछि न्याय सुनिश्चित हुनुपर्ने माग गरेका छन् ।
जजमाथि गम्भीर आरोप
अतुलले उत्तर प्रदेशको जौनपुरका एक न्यायाधीशमाथि मुद्दा मिलाउनका लागि ५ लाख घुस मागेको गम्भीर आरोप लगाएका छन् । सुसाइड नोटमा उनले न्यायाधीशसहित आफ्नी श्रीमती र सासुले आत्महत्या गर्न बाध्य बनाएको दाबी गरेका छन् ।
घटनाको विवरण
मूलत: बिहारका रहेका अतुलको शव बेंगलुरुको मन्जुनाथ लेआउटस्थित फ्ल्याटमा झुन्डिएको अवस्थामा भेटिएको हो । छिमेकीले ढोका तोडेर उनलाई मृत अवस्थामा फेला पारेका थिए । घटनास्थलमा ‘जस्टिस इज ड्यु’ लेखिएको प्लेकार्ड भेटिएको थियो ।
पारिवारिक विवाद र आर्थिक शोषण
सुसाइड नोटमा अतुलले २०१९ मा म्याट्रिमोनी साइटमार्फत भेटेकी श्रीमतीसँग विवाह गरेको र २०२१ देखि श्रीमतीले छोरासहित उनलाई छोडेर गएको उल्लेख गरेका छन् । उनले श्रीमती र उनका परिवारलाई लाखौं रुपैयाँ सहयोग गरे पनि, थप रकम दिन नसक्दा श्रीमतीले झूटो मुद्दा दायर गरेको बताएका छन् ।
प्रहरी अनुसन्धानमा
अतुलका परिवारको उजुरीका आधारमा प्रहरीले आत्महत्या दुरुत्साहनको मुद्दा दर्ता गरेको छ । घटना बारे थप अनुसन्धान भइरहेको छ । यस घटनाले परिवारभित्रको आर्थिक र भावनात्मक शोषण तथा न्यायप्रणाली प्रतिको प्रश्नलाई उजागर गरेको छ ।
