भारत । भारतको उत्तर प्रदेशस्थित अमरोहामा २३ वर्षीया युवतीमाथि चार जना प्रहरी कर्मचारीले सामूहिक बलात्कार गरेको आरोप लागेको छ । आरोपितमध्ये एक प्रहरी उपनिरीक्षक, एक हेड कन्स्टेबल र दुई प्रहरी कर्मचारी रहेको भारतीय सञ्चारमाध्यमले जनाएका छन् ।
प्रहरीका अनुसार हरियाणाकी ती युवतीलाई सीआरपीएफका इन्स्पेक्टर लालाराम र हेड कन्स्टेबल मोहितले अमरोहा ल्याएका थिए । उनीहरूले युवतीलाई हसनपुरस्थित झुलपुरी गाउँनजिक रहेको एक फार्म हाउसमा राखेको आरोप छ । उक्त फार्म हाउस उत्तराखण्डको खानपुर विधानसभा क्षेत्रका स्वतन्त्र विधायक उमेश शर्माको रहेको बताइएको छ ।
युवतीका अनुसार मंगलबार राति हसनपुर कोतवालीमा कार्यरत दरोगा संजय तोमर र हेड कन्स्टेबल प्रमोद मलिक पनि फार्म हाउस पुगेका थिए । त्यहाँ चारै जना पुरुषले खाना र मदिरा सेवन गरेपछि आफूलाई छुट्टै कोठामा लगिएको र सामूहिक बलात्कार गरेको उनले आरोप लगाएकी छन् ।
उनको बयानअनुसार मोहित, लालाराम र संजय तोमर कोठाभित्र प्रवेश गरी बलात्कार गरेको आरोप छ । तीन जना बाहिरिएपछि चौथो व्यक्ति प्रमोद मलिक कोठामा प्रवेश गर्न खोज्दा आफूले उनलाई धकेलेर ढोका भित्रबाट बन्द गरेको युवतीले बताएकी छन् । त्यसपछि युवतीले इन्टरनेटमार्फत अमरोहा प्रहरीको सम्पर्क नम्बर पत्ता लगाएर घटनाबारे प्रहरी अधिकारीलाई फोनमा जानकारी गराएको बताइएको छ ।
युवतीले मंगलबार राति नै घटनाबारे जानकारी गराए पनि तत्काल सार्वजनिक रूपमा कारबाही अघि नबढाइएको आरोप लागेको थियो । घटनाबारे दबाब बढेपछि बुधबार दिउँसो करिब ४ः२० बजे चारै जनाविरुद्ध मुद्दा दर्ता गरिएको जनाइएको छ ।
अमरोहाका प्रहरी उपरीक्षक लाखन सिंह यादवले युवतीको मेडिकल परीक्षण गराइएको र आरोपितहरूसँग सोधपुछ भइरहेको जानकारी दिएका छन् । प्रहरीले चारै जनालाई पक्राउ गरी घटनाबारे अनुसन्धान अघि बढाएको जनाएको छ ।
घटनाको गम्भीरतालाई ध्यानमा राख्दै मुरादाबादका डीआईजी मुनिराज जी. पनि बुधबार साँझ अमरोहा पुगेका थिए । उनले घटनाबारे प्रहरी उपरीक्षकसँग छलफल गरेका छन् । आरोपितमध्ये संजय तोमर र प्रमोद मलिक हसनपुर कोतवालीमा कार्यरत रहेको बताइएको छ । प्रहरीले घटनाको विस्तृत अनुसन्धान भइरहेको जनाएको छ ।
