काठमाडौं । तराईका विभिन्न जिल्लाहरूमा लगातार दुई दिनदेखि हुस्सु र कुहिरो लाग्दा जनजीवन प्रभावित भएको छ । शनिबार र आइतबारको दिनभरि छाएको घना कुहिरो र चिसोका कारण सर्वसाधारणको दैनिकी कष्टकर बनेको छ ।
शीतलहरको कारणले घर बाहिर निस्कने मानिसहरूको सङ्ख्या कम भएको छ भने ज्येष्ठ नागरिक र बालबालिकाहरू बढी प्रभावित भएका छन् । मौसम विज्ञान कार्यालयका अनुसार तराईका जिल्लाहरूमा तापक्रम निरन्तर घटिरहेको छ ।
शनिबार अधिकतम तापक्रम १५ डिग्री सेल्सियस र न्यूनतम ९.५ डिग्री सेल्सियस मापन गरिएको थियो । आइतबार बिहानको न्यूनतम तापक्रम १०.५ डिग्री सेल्सियस र अन्य क्षेत्रमा ९ डिग्री सेल्सियससम्म पुगेको छ ।
चिसोका कारणले पीडित सर्वसाधारणलाई राहत प्रदान गर्न स्थानीय प्रशासनले विभिन्न स्थानमा दाउरा उपलब्ध गराएर आगो ताप्ने व्यवस्था गरेको छ । साथै, जल तथा मौसम विज्ञान विभागले शीतलहरले स्वास्थ्यमा असर पार्न सक्ने भएकाले विशेष सावधानी अपनाउन आग्रह गरेको छ ।
जाडो मौसममा विशेष गरी बालबालिका, ज्येष्ठ नागरिक र बिरामीहरूलाई चिसोबाट बच्न थप सतर्कता अपनाउन सुझाइएको छ ।
