जनकपुरधाम । धनुषा र बारा जिल्लामा शुक्रबार र शुक्रबार राति दुई छुट्टाछुट्टै स्थानमा आगलागी हुँदा करिब पाँच लाख रुपैयाँ बराबरको धनमाल जलेर नष्ट भएको छ ।
धनुषाको जनकपुरधाम उपमहानगरपालिका ३ देवान पोखरीस्थित विश्वनाथ प्रसाद साहले सञ्चालन गरेको श्रीकृष्ण डिस्पोजल उद्योगमा शुक्रबार दिउँसो विद्युत् सर्ट हुँदा आगलागी भएको जिल्ला प्रहरी कार्यालय धनुषाले जनाएको छ ।
आगलागीबाट उद्योगभित्र रहेको डिस्पोजल सामाग्री, कच्चा पदार्थ र मेसिनसहित करिब तीन लाख रुपैयाँ बराबरको क्षति भएको प्रहरीले जनाएको छ ।
त्यस्तै बाराको सुवर्ण गाउँपालिका १ बगही टोलमा गए राति नथुनी मुखियाको गोठमा आगलागी हुँदा गोठ पूर्ण रूपमा जलेर करिब दुई लाख रुपैयाँ बराबरको धनमाल नष्ट भएको छ ।
दुवै घटनामा स्थानीयवासी र प्रहरीको सहयोगमा दमकल प्रयोग गरी आगो नियन्त्रणमा लिइएको प्रहरीले जनाएको छ । प्रारम्भिक अनुमान अनुसार विद्युत् सर्ट र सम्भावित बेवास्ताका कारण आगलागी भएको बताइएको छ ।
घटना बारे थप अनुसन्धान जारी रहेको जिल्ला प्रहरी कार्यालयले जनाएको छ ।
