दाङ । सामुदायिक वनको काठ काटेको आरोपमा दाङको राजपुर गाउँपालिका ७ का वडाअध्यक्ष पुष्कर वलीसहित ६ जना पक्राउ परेका छन् । पक्राउ पर्नेहरूमा वडा अध्यक्ष वलीका साथै उनका दाजु घनबहादुर वली, घनबहादुरका छोरा तिलक वली र थप व्यक्तिहरू पदमबहादुर खड्का, भुपलाल बोटे र बालाराम कुमाल रहेका छन् ।
उनीहरुलाई आरोप छ कि विद्युत् तार विस्तारका क्रममा राप्ती किनारको सामुदायिक वनमा तार मुनि परेका साल, ढौँटी र खयर प्रजातिका रुखहरू काटिएका थिए, जसलाई डिभिजन वन कार्यालय देउखुरीले संज्ञानमा लिएको छ । डिभिजन वन कार्यालय देउखुरीले वडाअध्यक्षको मिलेमतोमा वनका रुख काटिएको उजुरी पाएपछि अनुसन्धान अघि बढाएको हो ।
अख्तियार कार्यालयले छानबिन गरी सत्यतथ्य पठाउन निर्देशन दिएपछि डिभिजन वन कार्यालयले वन अधिकृत छोटेलाल चौधरीलाई अनुसन्धान अधिकृत तोकेको थियो । अनुसन्धानको क्रममा सामुदायिक वनमा विभिन्न ७४ प्रजातिका रुखहरू काटिएको र लगभग तीन सय क्यूफिट काठ कटान भएको पुष्टि भएको छ, भनी चौधरीले जानकारी दिए ।
तीन व्यक्तिलाई बयानका लागि जिल्ला अदालतमा प्रस्तुत गरिएको छ भने वडाअध्यक्ष वलीसहित अन्य तीन जनालाई अदालतमा बोलाउँदा सम्पर्कमा नआएकाले डिभिजन वन कार्यालयले उनीहरूलाई पुगेर नियन्त्रणमा लिनु परेको बताइएको छ । हाल वडाअध्यक्ष वली र अन्यलाई जिल्ला अदालतमा पेश गर्ने तयारी भइरहेको डिभिजन वन कार्यालय दाङले जनाएको छ ।
