काठमाडौं । काठमाडौं उपत्यकासहित देशका थप क्षेत्रमा मनसुन समाप्त हुँदै गएको छ । मौसम पूर्वानुमान महाशाखाले मंगलबार जारी गरेको “मनसुन बहिर्गमन बुलेटिन २” अनुसार आज (असोज २२) का दिन कर्णाली प्रदेश, लुम्बिनी प्रदेश र गण्डकी प्रदेशका सम्पूर्ण भूभागका साथै काठमाडौं उपत्यका लगायत बागमती प्रदेशको पश्चिमी क्षेत्र र मधेस प्रदेशको पश्चिमी भागका केही स्थानबाट मनसुन बाहिरिएको छ ।
यसअघि, असोज २० गते सुदूरपश्चिम प्रदेशका साथै कर्णाली प्रदेशका अधिकांश भूभाग र लुम्बिनी प्रदेशको पश्चिमी क्षेत्रका केही स्थानबाट मनसुन हटेको थियो । आज थप क्षेत्रमा मनसुन समाप्त भएको मौसम महाशाखाले जानकारी दिएको छ ।
महाशाखाले जारी गरेको बुलेटिनमा भनिएको छः “२०८१ असोज २२ (८ अक्टोबर २०२४) का दिन कर्णाली प्रदेश, लुम्बिनी प्रदेश, गण्डकी प्रदेशका सम्पूर्ण क्षेत्र, काठमाडौं उपत्यका लगायत बागमती प्रदेशको पश्चिमी भाग र मधेस प्रदेशको पश्चिमी भागका केही स्थानबाट मनसुन बाहिरिएको छ ।”
मनसुन पहिले असोज २० गते सुदूरपश्चिम प्रदेश, कर्णाली प्रदेशका धेरै स्थानहरू र लुम्बिनी प्रदेशको पश्चिमी क्षेत्रबाट बाहिरिएको थियो । अब मनसुन केवल बागमती प्रदेशको पूर्वी क्षेत्र, मधेस प्रदेशको पश्चिमी भागका केही स्थान र पूर्वी क्षेत्र तथा कोसी प्रदेशमा बाँकी रहेको मौसम विभागले बताएको छ । केही दिनभित्रै यी बाँकी क्षेत्रहरूबाट पनि मनसुन बाहिरिने सम्भावना छ ।
मौसमविद्का अनुसार, नेपालमा औसत रूपमा जुन १३ मा मनसुन प्रवेश गर्छ भने अक्टोबर २ मा बाहिरिन्छ । तर यस वर्ष, मनसुन तीन दिन छिटो जुन १० मा प्रवेश गरेको भए पनि, बाहिरिन भने औसतभन्दा ढिला भएको हो ।
नेपालमा मनसुन पूर्वबाट प्रवेश गरी क्रमश: पश्चिमतर्फ फैलिन्छ र बाहिरिँदा पश्चिमबाट सुरु हुँदै पूर्वतर्फ नै बाहिरिन्छ । मनसुन पूर्ण रूपमा नेपालबाट बाहिरिएपछि पोस्ट-मनसुन सिजन सुरु हुने मौसमविद्हरू बताउँछन्, जुन नोभेम्बरसम्म रहनेछ । त्यसपछि हिउँद याम सुरु हुन्छ ।
