काठमाडौं । अनामनगरस्थित सिलौटो रेस्टुरेन्टले खाजामा साङ्ला भेटिएपछि तीन लाख रुपैयाँ जरिवाना तिर्नु परेको छ । वाणिज्य आपूर्ति तथा उपभोक्ता संरक्षण विभागले सोमबार जरिवाना लगाएको जानकारी दिएको छ ।
सोमबार ट्रक व्यवसायी महासंघले आयोजना गरेको पत्रकार सम्मेलनका क्रममा खाजामा साङ्ला फेला परेको उजुरी परेपछि विभागले अनुगमन गरेको थियो ।
विभागका महानिर्देशक राजन पौडेलका अनुसार, अनुगमन टोलीले खाजामा साङ्ला भेटिएको पुष्टि गरेपछि रेस्टुरेन्टलाई तीन लाख रुपैयाँ जरिवाना गरिएको हो ।
महानिर्देशक पौडेलले भने, ‘हाम्रो टोलीले उजुरीका आधारमा अनुगमन गर्दा किरा भेटिएको पुष्टि भएको छ । त्यसपछि रेस्टुरेन्टलाई जरिवाना गरिएको हो ।’
रेस्टुरेन्टका सञ्चालकसँग सम्पर्क गर्दा उनी यस विषयमा कुनै प्रतिक्रिया दिन इच्छुक देखिएनन् । विभागले उपभोक्ता संरक्षणका लागि यस प्रकारका अनुगमनलाई निरन्तरता दिने जनाएको छ ।
