दोलखा । दोलखाको भीमेश्वर नगरपालिका ८ बोचमा यात्रुबाहक बस दुर्घटना हुँदा ४२ जना घाइते भएका छन् । बुधबार बिहान १० बजे काठमाडौंबाट चरीकोटतर्फ आउँदै गरेको बस दुर्घटना भएको हो । प्रदेश ३–०१–००६३६ नम्बरको बस दुर्घटनामा परेपछि ४२ जना घाइते भएका छन्, जसमा दुई जनाको अवस्था गम्भीर रहेको जिल्ला प्रहरी कार्यालय दोलखाले जानकारी दिएको हो ।
गम्भीर घाइते हुनेमा ओखलढुङगाको लिखु गाउँपालिका ७ गाम्नाङटारकी ६ वर्षीया आरुसी खत्री र सोही स्थानकी ३३ वर्षीया दिपा खत्री रहेका छन् । उनीहरूको टाउकोमा चोट लागेर अवस्था गम्भीर भएकाले धुलिखेल अस्पतालमा पठाइएको प्रहरी निरीक्षक दाताराम अधिकारीले जानकारी दिए ।
यस्तै अन्य घाइतेहरूलाई चरीकोटस्थित च्छोरोल्पा अस्पतालमा भर्ना गरिएको छ र सामान्य उपचारपछि अधिकांशलाई डिस्चार्ज गरिएको छ । काठमाडौंबाट ओखलढुंगाका लागि छुटेको बस मोडमा चिप्लिएर दुर्घटना भएको थियो ।
दुर्घटनापछि चालक ३५ वर्षीय दिपेश श्रेष्ठलाई, जो काभ्रेपलाञ्चोकको पनौतीका निवासी हुन्, उनलाई नियन्त्रणमा लिइएको जानकारी प्रहरी निरीक्षक अधिकारीले दिए ।
