वीरगञ्ज । बंगालको खाडीमा विकसित चक्रवात ‘अर्णव’को सम्भावित प्रभावले आगामी बिहीबारदेखि नेपालका विभिन्न क्षेत्रमा वर्षा हुन सक्ने पूर्वानुमान गरिएको छ । विशेष गरी शुक्रबार र शनिबार मेघगर्जन, चट्याङ तथा हावाहुरीसहित मध्यमदेखि भारी वर्षा हुन सक्ने सम्भावना रहेकाले मधेस प्रदेशका बासिन्दालाई सतर्क रहन आग्रह गरिएको छ ।
जल तथा मौसम विज्ञान विभागअन्तर्गतको मौसम पूर्वानुमान महाशाखाले विशेष मौसमी बुलेटिन जारी गर्दै चक्रवातको प्रभावले देशका विभिन्न स्थानमा वर्षा तथा उच्च पहाडी र हिमाली क्षेत्रमा हिमपात हुन सक्ने जनाएको छ ।
महाशाखाका अनुसार बंगालको खाडीमा विकसित चक्रवात उत्तरपश्चिम दिशातर्फ अघि बढ्दै भारतको आन्ध्र प्रदेश र विशाखापट्टनमबीचको तटीय क्षेत्रनजिक यानम आसपास प्रवेश गर्ने सम्भावना छ । उक्त प्रणालीको प्रभावले नेपालको मौसम बदली भई वर्षाको गतिविधि बढ्न सक्ने अनुमान गरिएको छ ।
महाशाखाको पूर्वानुमानअनुसार कात्तिक १२ गते बिहीबारदेखि मौसममा परिवर्तन सुरु हुने र कात्तिक १३ तथा १४ गते शुक्रबार र शनिबार वर्षाको सम्भावना छ । कोशी, मधेस, बागमती र गण्डकी प्रदेशका धेरै स्थानमा मेघगर्जन, चट्याङ तथा हावाहुरीसहित मध्यम वर्षा हुन सक्ने र केही स्थानमा भारी वर्षा हुने सम्भावना रहेको बुलेटिनमा उल्लेख छ ।
मधेस प्रदेशका पर्सा, बारा, रौतहट, सर्लाही, महोत्तरी, धनुषा, सिरहा र सप्तरी जिल्लामा वर्षाको तीव्रताअनुसार जनजीवन प्रभावित हुन सक्ने भएकाले सम्बन्धित निकाय तथा सर्वसाधारणलाई पूर्वतयारी गर्न आग्रह गरिएको छ ।
धानबाली भित्र्याउने समयमा वर्षाको जोखिम
मधेस प्रदेशका धेरै क्षेत्रमा धानबाली भित्र्याउने समय भएकाले सम्भावित वर्षाले कृषि क्षेत्रमा असर पार्न सक्ने देखिएको छ । खेतमा काटेर राखिएको धान भिज्ने, सुकाउन राखिएको अन्नमा क्षति पुग्ने तथा खेतमा पानी जम्दा कटानी र ढुवानीको काम प्रभावित हुन सक्ने जोखिम छ ।
त्यसैले किसानलाई मौसमको पूर्वानुमान हेरेर सम्भव भएसम्म पाकेको धान सुरक्षित रूपमा भित्र्याउन, काटिएको धानलाई वर्षाबाट जोगाउन र भण्डारण गरिएका कृषि उपज सुरक्षित स्थानमा राख्न सुझाव दिइएको छ ।
होचा भूभाग र नदी किनारका बासिन्दालाई सतर्क रहन आग्रह
भारी वर्षा भएमा मधेस प्रदेशका तराई क्षेत्रमा पानीको निकास अवरुद्ध हुँदा स्थानीय बस्ती, सडक तथा खेतीयोग्य जमिनमा पानी जम्ने जोखिम रहन्छ । विशेष गरी होचा भूभाग, नदी तथा खोलानजिकका बस्ती र कमजोर जलनिकास भएका क्षेत्रमा बसोबास गर्ने नागरिकले सतर्कता अपनाउन आवश्यक छ ।
पर्सा र बारासहितका जिल्लामा वर्षाको अवस्था हेरी स्थानीय खोलानाला तथा नदीमा पानीको सतह बढ्न सक्ने भएकाले जोखिमयुक्त स्थानमा अनावश्यक आवतजावत नगर्न र बाढी आएको पानी पार गर्ने प्रयास नगर्न सर्वसाधारणलाई सुझाव दिइएको छ ।
चट्याङ र हावाहुरीबाट जोगिन आग्रह
सम्भावित प्रतिकूल मौसमलाई ध्यानमा राख्दै नागरिकलाई मौसमसम्बन्धी आधिकारिक सूचना नियमित रूपमा हेर्न, चट्याङ पर्ने समयमा खुला स्थानमा नबस्न, रूखमुनि आश्रय नलिन तथा विद्युत्का पोल र तारबाट टाढा रहन सुझाव दिइएको छ ।
त्यसैगरी, उच्च पहाडी तथा हिमाली क्षेत्रमा हिमपात र प्रतिकूल मौसमको जोखिम हुन सक्ने भएकाले ती क्षेत्रमा यात्रा गर्ने पर्यटक तथा पदयात्रीलाई मौसमको अवस्था बुझेर मात्र यात्रा गर्न आग्रह गरिएको छ ।
मौसमको प्रभाव क्षेत्रअनुसार फरक पर्न सक्ने भएकाले सर्वसाधारणलाई मौसम पूर्वानुमान महाशाखा, स्थानीय प्रशासन तथा सम्बन्धित निकायबाट जारी हुने आधिकारिक सूचनाका आधारमा आवश्यक निर्णय लिन अनुरोध गरिएको छ ।
