काठमाडौं । मंसिर १६ गतेका लागि स्थानीय तहका रिक्त पदहरूमा उपनिर्वाचन हुने भएको छ । निर्वाचन आयोगले विभिन्न स्थानीय तहमा खाली रहेका ४४ पदका लागि उपनिर्वाचन गर्ने तयारी गरेको हो । यसमा जिल्ला समन्वय समितिका प्रमुख २, गाउँपालिका अध्यक्ष २, उपाध्यक्ष ४, नगरपालिका प्रमुख १, उपप्रमुख १ र वडाध्यक्ष ३४ पदका लागि निर्वाचन हुनेछ ।
विशेष गरी ओखलढुंगा र कैलालीका जिल्ला समन्वय समिति प्रमुख, काठमाडौंको कीर्तिपुर नगरपालिकाको प्रमुख, जाजरकोटको नलगाड नगरपालिकाको उपप्रमुख, मोरङको ग्रामथान र दैलेखको महाबु गाउँपालिकाका अध्यक्ष पदमा पनि उपनिर्वाचन हुने आयोगले जनाएको छ ।
विभिन्न वडाध्यक्ष पदका लागि ताप्लेजुङ, झापा, तेह्रथुम, सुनसरी, ओखलढुङ्गा, उदयपुर, सप्तरी, धनुषा, महोत्तरी, रौतहट, काठमाडौँ लगायतका जिल्लामा उपनिर्वाचन हुनेछ। काठमाडौँको कीर्तिपुर नगरपालिका, काठमाडौं महानगरपालिका, नुवाकोटको ककनी गाउँपालिका, मकवानपुरको हेटौँडा नगरपालिका, गोरखाको गोरखा नगरपालिका लगायतका वडामा पनि उपनिर्वाचन हुँदैछ ।
निर्वाचन ऐन, २०७३ अनुसार, जिल्ला समन्वय समितिका प्रमुख, उपप्रमुख, गाउँपालिका अध्यक्ष, उपाध्यक्ष, नगरपालिका प्रमुख, उपप्रमुख, र वडाध्यक्षको पदावधि समाप्त नहुँदै पद रिक्त भएमा एक वर्षभन्दा बढी समय बाँकी रहँदा उपनिर्वाचनमार्फत पदपूर्ति गरिने व्यवस्था छ ।
निर्वाचन तालिका
मंसिर २ गते उम्मेदवार मनोनयन दर्ता गरिनेछ, जसमा बिहान १० देखि अपराह्न ५ बजेसम्म उम्मेदवारको नाम दर्ता गर्न सकिनेछ । त्यसपछि, मंसिर ३ गते उम्मेदवारविरुद्ध उजुरी दिन सकिनेछ र मंसिर ४ गते अन्तिम नामावली प्रकाशन गरिनेछ । मंसिर ५ गते उम्मेदवारले आफ्नो नाम फिर्ता लिन सक्नेछन् र त्यसै दिन चुनाव चिन्ह पनि वितरण गरिनेछ । मतदान मंसिर १६ गते बिहान ७ देखि अपराह्न ५ बजेसम्म हुनेछ ।
खर्च सीमा
निर्वाचन आयोगले उम्मेदवारका लागि खर्च सीमा तोकेको छ । नगरपालिकाका प्रमुख तथा उपप्रमुख पदका उम्मेदवारले अधिकतम ४ लाख ५० हजार खर्च गर्न सक्नेछन्, भने गाउँपालिका अध्यक्ष तथा उपाध्यक्षका उम्मेदवारले ३ लाख ५० हजार खर्च गर्न पाउनेछन् । वडाध्यक्ष पदका उम्मेदवारको खर्च सीमा पनि नगरपालिकाको हकमा २ लाख र गाउँपालिकाको हकमा १ लाख ५० हजार रहेको छ ।
उपनिर्वाचनमा राजनीतिक दलहरूको सहभागिता
२५ वटा राजनीतिक दलले उपनिर्वाचनमा भाग लिनेछन् । यसमा नेपाली कांग्रेस, नेपाल कम्युनिष्ट पार्टी (एमाले), नेपाल कम्युनिष्ट पार्टी (माओवादी केन्द्र), राष्ट्रिय स्वतन्त्र पार्टी, जनता समाजवादी पार्टी नेपाल, र नेपाल मजदुर किसान पार्टी जस्ता दलहरूको सहभागिता रहेको छ ।
