वीरगंज । सखुवाप्रसौनी गाउँपालिकामा मल वितरणमा विभेद भएको भन्दै किसानले गुनासो गरेका छन् । वडा नं ३ का एक किसानले आफ्नो खेती वडा नं २ मा पर्ने भएपनि त्यहाँका वडाध्यक्ष र सहकारी संस्थाले मल उपलब्ध नगराएको आरोप लगाएका छन् ।
उक्त किसानले ६ बिघा खेत रहेको र अन्य किसानहरूसरह दामासाही हिसाबमा मल माग गर्दा बेवास्ता गरिएको बताए । उनले घर भएको वडा र जग्गा रहेको वडा दुबै स्थानबाट मल प्राप्त गर्न नसकेको गुनासो गरेका छन् ।
वडा नं २ का वडाध्यक्षले मल अभावका कारण समस्या उत्पन्न भएको बताए । उनका अनुसार, वडा नं २ मा एक हजार ३३० हेक्टर खेतीयोग्य जमिन रहेपनि ९५० हेक्टरलाई मात्र पुग्ने मल उपलब्ध भएकाले वितरणमा समस्या भएको हो ।
गाउँपालिका उपाध्यक्षले मल वितरणमा कुनै प्रकारको विभेद भएको पाइएमा कारबाही गरिने बताइन् । उनले वडाध्यक्ष र सहकारीसँग छलफल गरी वास्तविक स्थिति सार्वजनिक गर्ने जानकारी दिइन् ।
कृषि ज्ञान केन्द्र, पर्साले सखुवाप्रसौनी गाउँपालिकाका छ वडामा मल वितरणका लागि नौ वटा सहकारीलाई जिम्मेवारी दिएको थियो । केन्द्रले युरिया र डिएपी मल उपलब्ध गराए पनि वडा नं २ मा वितरणमा विभेद भएको आरोप किसानहरूले लगाएका छन् ।
अन्य वडामा भने मल वितरणमा यस प्रकारका गुनासा नआएको सहकारीले जनाएका छन् । यस विषयमा थप अनुसन्धान जारी रहेको जनाइएको छ ।
