रौतहट । राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र साह ‘बालेन’को रौतहट आगमनले चन्द्रनिगाहपुर र गरुडा क्षेत्रमा राजनीतिक सरगर्मी बढाएको छ । दुवै स्थानमा उनलाई समर्थक तथा सर्वसाधारणले भव्य स्वागत गरेका थिए ।
बालेनलाई एक झलक हेर्न र समर्थन जनाउन ठूलो संख्यामा मानिसहरू सडकमा उत्रिएपछि केही समयका लागि बजार क्षेत्र व्यस्त बनेको थियो । चन्द्रनिगाहपुर र गरुडा बजारमा भीड बढेपछि ट्राफिक व्यवस्थापनमा समेत चुनौती देखिएको थियो ।
सुरक्षा संवेदनशीलतालाई ध्यानमा राख्दै स्थानीय प्रशासनले सुरक्षाकर्मी परिचालन गरी भीड व्यवस्थापन गरेको जनाएको छ । कार्यक्रमका क्रममा स्थानीय बासिन्दाले सडकको जर्जर अवस्था, स्वच्छ खानेपानीको अभाव, स्वास्थ्य सेवाको कमजोरी तथा बढ्दो बेरोजगारी जस्ता समस्याहरू खुला रूपमा उठाएका थिए ।
“वर्षौंदेखि उस्तै समस्या दोहोरिँदै आएको छ, समाधान भएको देखिँदैन,” एक स्थानीयले गुनासो व्यक्त गरे । समर्थकहरूसँगको संक्षिप्त भेटघाटमा बालेनले जनताको आवाजलाई प्राथमिकतामा राख्ने प्रतिबद्धता जनाउँदै अभिवादन गरेका थिए ।
गरुडामा सम्पन्न रोड शोपछि रौतहटको चुनावी वातावरण थप सक्रिय बनेको विश्लेषण गरिएको छ । आगामी निर्वाचन नजिकिँदै जाँदा बालेनको सक्रियताले स्थानीय राजनीतिक समीकरणमा कस्तो प्रभाव पार्नेछ भन्ने विषयमा चासो बढ्दै गएको छ ।
