काठमाडौं । सरकारको निर्णयअनुसार एकनारायण अर्याललाई मुख्यसचिवको पदमा नियुक्त गरेपछि राष्ट्रिय योजना आयोगका सचिव तोयनारायण ज्ञवालीले राजीनामा दिएका छन् । ज्ञवाली पनि मुख्यसचिवको दौडमा थिए, तर उनलाई उक्त पदमा नियुक्त नगरी अर्याललाई चयन गरिएकोले उनले राजीनामा गरेका हुन् ।
बिहीबारको मन्त्रिपरिषद् बैठकले वर्तमान गृहसचिव अर्याललाई मुख्यसचिवको रूपमा नियुक्त गर्ने निर्णय गरेको हो । ५८ वर्षको उमेर हदका कारण हालका मुख्यसचिव लिलादेवी गड्तौला भदौ १५ गते अनिवार्य अवकाशमा जान लागेका छन्, जसले गर्दा नयाँ मुख्यसचिव नियुक्त गरिएको हो ।
मुख्यसचिवको दौडमा सार्वजनिक खरिद अनुगमन कार्यालयका सचिव रामकृष्ण सुवेदी, महिला बालबालिका तथा ज्येष्ठ नागरिक मन्त्रालयका सचिव दिनेश भट्टराई, र भूमि व्यवस्था, सहकारी तथा गरीबी निवारण मन्त्रालयका सचिव अर्जुनप्रसाद पोखरेल पनि रहेका थिए ।
