काठमाडौं । माध्यमिक शिक्षा परीक्षा (एसईई) मा अनुत्तीर्ण भएका अर्थात् नन-ग्रेडेड (एनजी) विद्यार्थीहरूले अब प्राविधिक शिक्षा तथा व्यावसायिक तालिम परिषद् (सिटिइभिटी) को प्री डिप्लोमा कोर्समा अध्ययन गर्न पाउने भएका छन् ।
सिटिइभिटीको यो निर्णयसँगै एसईईमा असफल भएका ९० हजार ८८८ जना विद्यार्थीहरूलाई प्री-डिप्लोमा कोर्समा भर्ना हुने अवसर मिलेको छ । शिक्षा, विज्ञान तथा प्रविधि मन्त्रालयको पहलमा यो निर्णय गरिएको हो, जसको उद्देश्य एसईईमा एनजीमा परेका विद्यार्थीहरूको समय खेर नजाओस् भन्ने हो ।
प्री-डिप्लोमा कोर्स १८ महिनाको हुन्छ । यसमा १२ महिना पढाइ र ६ महिना ओजेटी (अन द जब ट्रेनिङ) अथवा १५ महिना पढाइ र ३ महिना ओजेटी समावेश हुन्छ । विद्यार्थीहरू होटल व्यवस्थापन, कृषि, इन्जिनियरिङ लगायत २३ वटा विभिन्न विषयमा आधारित कोर्सहरू अध्ययन गर्न सक्नेछन् ।
सिटिइभिटीका सहपरीक्षा नियन्त्रक गोविन्दकुमार श्रेष्ठका अनुसार, एसईईमा सहभागी भएर जति विषयमा एनजी आए पनि विद्यार्थीहरूले यो कोर्सको अध्ययन गर्न पाउनेछन् । यस वर्ष एसईईको नतिजा उत्तीर्ण र एनजी समूहमा विभाजन गरेर सार्वजनिक गरिएको थियो, जबकि अघिल्ला वर्षहरूमा ग्रेडअनुसार विभाजन गरिन्थ्यो ।
यो नयाँ व्यवस्थामा, एसईई परीक्षामा अनुत्तीर्ण भएर कक्षा ११ मा भर्ना हुनबाट वञ्चित भएका विद्यार्थीहरूलाई पनि प्री-डिप्लोमा कोर्समा अध्ययनको मौका दिइएको छ । गत वर्षसम्म निश्चित ग्रेड प्राप्त गरेका विद्यार्थीहरू प्री-डिप्लोमा कोर्समा भर्ना हुने गर्थे ।
२०८० सालको एसईई परीक्षामा अनुत्तीर्ण भएका र अनुपस्थित विद्यार्थीहरूलाई ग्रेड वृद्धि परीक्षामा सहभागी हुने अवसर दिइएको थियो, जसमा २ लाख १० हजार ३२१ जना सहभागी भए, तर ५६.७८ प्रतिशत अर्थात् एक लाख १९ हजार ४२५ जना मात्र उत्तीर्ण भएका थिए ।
