वीरगञ्ज । देशकै प्रमुख आर्थिक नाका वीरगञ्ज भन्सार कार्यालयले चालु आर्थिक वर्षको दोस्रो महिनामा लक्ष्यको करिब शतप्रतिशत राजस्व संकलन गरेको छ । कार्यालयले भदौ महिनामा मात्रै २३ अर्ब ४६ करोड १५ लाख रुपैयाँ राजस्व संकलन गरेको हो ।
भदौ ३१ गतेसम्मको तथ्यांकअनुसार कार्यालयले पाएको मासिक राजस्व लक्ष्यको ९९ दशमलव ७५ प्रतिशत रकम संकलन भएको छ । भन्सार कार्यालयका प्रमुख भन्सार प्रशासक कृष्णप्रसाद मैनालीका अनुसार भदौ मसान्तसम्मको राजस्व संकलनले चालु आर्थिक वर्षको वार्षिक लक्ष्यको १४ दशमलव ५२ प्रतिशत हिस्सा पूरा भएको छ ।
वीरगञ्ज नाकाबाट आयात हुने वस्तुमध्ये बिस्कुट, दलहन, लत्ताकपडा, औद्योगिक कच्चा पदार्थ तथा खाद्यान्नले राजस्वमा उल्लेख्य योगदान गर्दै आएका छन् । चालु आर्थिक वर्षको सुरुवाती दुई महिनाको राजस्व असुलीलाई हेर्दा वीरगञ्ज भन्सार कार्यालयले आफ्नो लक्ष्य क्रमश: पछ्याउँदै गएको देखिन्छ ।
आयात–निर्यात कारोबारमा भएको गतिविधिसँगै भन्सार राजस्व संकलनमा समेत सुधार देखिएको कार्यालयको तथ्यांकले देखाएको छ । भन्सार कार्यालयका अनुसार भदौ ३१ गते वीरगञ्ज भन्सार नाकाबाट पैठारी भई जाँचपास भएका प्रमुख २० वस्तुबाट मात्रै ४१ करोड ८३ लाख रुपैयाँ राजस्व संकलन भएको थियो ।
कार्यालयले आयात हुने वस्तुको परिमाण, मूल्य तथा राजस्व योगदानका आधारमा राजस्व संकलनको अवस्थाको निरन्तर विश्लेषण गर्दै आएको जनाएको छ ।
